Nasikop sa kapulisan human sa usa ka buy bust operation ang tulo (3) mga street level individual (SLI) nga drug suspect nga naapil sa drug watchlist sa lungsod sa Dauis.
Gi-ila ang mga akusado nga sila si Junzin Roey Nisnisan Patanpatan, alias Pacio, 21, ulitawo; Mar Jhon Lopoz Dela Cruz, 26, ulitawo; ug si Jiovanni Lopos Papolonias, 30, ulitawo – pulos taga Purok 6, barangay Totolan, Davis, Bohol.
Gidakop ang tulo ka SLI sa gihimong buy bust operation sa Dauis Municipal Police Station pinangulohan ni Police Lieutenant Bonifacio Tañola, chief of police didto sa Purok 6, barangay Totolan, mga alas 10:15 sa buntag, Decembre 21, 2020.
Nasakmit gikan sa mga suspects ang duha ka gagmay nga mga sachet sulod sa gituohang shabu, P1,000 peso bill nga gigamit nga buy bust money, usa ka unit cellphone, tulo ka empty sachets sulod ang gituohang shabu, usa ka lighter, ug tulo ka rolyo nga aluminum foil nga gigamit nga tooter.
Gibana-banang anaa sa 0.8 grams ang nasakmit nga gituohang shabu ug dunay Dangerous Drugs Board value nga P544.00.
Gibilanggo karon ang mga suspects sa Dauis Municipal Police Station samtang ang ebidensiya gisumiter ngadto sa Bohol Philippine National Police Crime Laboratory alang sa examination ug pasakaan ug kasong paglapas sa Akta Republika 9165 o Dangerous Drugs Act of 2002.