Hingpit nga napasakaan sa kasong illegal nga pahupot sa drogas ang duha ka mga gitumbok nga high value target kinsa nasakmitan sa tunga sa kilong nga gidudahang shabu nga adunay kantidad nga P 3.4 milyones.
Sila si Enrique Calamba Loreniana ug Mario Loquellano Jr, nag-atubang sa kasong kalapasan sa sec. 5 ug 11 sa Akta Republika 9165 ug ang sumbong gisang-at ngadto sa Provincial Prosecutors Office.
Kahinumduman nga nasikop si Loreniana ug Loquellano sa mga operatiba sa Philippine Drug Enforcement Agency uban ang laing mga operating unit sa Philippine National Police drug enforcement team didto sa lungsod sa Baclayon human gipahigayon ang buybust operation batok sa mga suspek.
Nasakmit gikan sa mga suspetsado ang gidudahang shabu nga motimbang sa tunga sa kilo.
Kasamtangan nga anaa sa bilangoan sa lungsod sa Baclayon ang mga dinakpan samtang nagpaabot sa commitment order aron ibalhin ngadto sa prisohan nga nahimutang sa barangay Cabawan.