Gitaho sa superintendent sa Bohol Division of Schools nga mao si Dr. Bianito Dagatan nga dili na mahinayon ang laraw diin unom ka mga pampublikong tunghaan sa Bohol ang unta apil sa pilot testing sa face-to-face classes nga sugdan sa sunod bulan.
Gitaho mismo ang bag-ong katikaran pinaagi sa usa ka pakighinabi sa radyo sa Lunes, Dis. 28, 2020 sa tulumanong Open Forum nga gidumala ni Ardy Araneta-Batoy ug Dave Albarado.
Atong mahinumduman nga supak si Presidente Duterte sa pagpahigayon ug face-to-face classes nga limitado tungod kay adunay bag-ong strain sa Coronavirus disease (Covid) nga mitumaw ug naghatag ug bag-ong bahad sa kasanihan sa publiko.
Tungod kay di na madayon ang limitadong face-to-face classes, padayon ang mga bata sa ilang pagtuon pinaagi sa mga modules.
Giklaro ni Dagatan nga kon nahinayon pa ang face-to-face classes, nagkinahanglan kini ug pagtugot ang mga ginikanan aron makaapil ang tinun-an.
Nunot niini, ang usa ka tinun-an mosulod lang sa tunghaan maka duha sa usa ka semana ug ang klase molungtad ug dili momenos sa tunga sa adlaw.
Gisaad usab ni Dagatan nga ipahibalo sa mga magtutudlo kon nahatag na ang feedback sa mga ginikanan kabahin sa mga sayop sa module kon ang mga sayop gitaho na sa mga tinugyanan.
Sa laing bahin, miingon si Dagatan nga magpadayon ang klase karong umaabot Enero 4, 2021.