Mitug-an si Sen. Christopher Lawrence “Bong” Go nga gipadayon gihapon sa kagamhanan ang pagpaangita kon asa mopalit ug bakuna nga magamit batok sa Coronavirus disease (Covid).
Matud pa ni Go nga nagpadayon ang National Task Force Against Covid-19 (NTF) sa pagpangita ug tinubdan sa bakuna nga mahimong. mapalit sa nasud. Si Sec. Carlito Galvez, ang pangulo sa NTF, ang gitahasan nga mangita ug supplier sa bakuna nga mahimong magamit sa mga Pilipino.
Asoy pa ug dugang ni Go nga daghang mga kompanya ang gilantaw sa kagamhanan nga posibleng mahimong tinubdan sa bakuna nga paliton alang sa mga Pilipino.
Matud niya nga nagpakita ug kasibot ang pribadong sektor nga mutabang sa pagpalit sa bakuna batok Covid.
Si Go, ang chairman sa Committee on Health sa Senado, misulti na mahinungdanon nga ang mapili nga bakuna luwas ug epektibo alang sa kahimsog sa panglawas sa katawhan.
Ang unahon nga hatagan ug bakuna mao ang mga kabus ug kadtong nagkinaganglan nga matupukan sa bakuna sama sa mga batan-on ug mga senior citizens.
Gipasabot ni Go nga dili unahon ang mga politiko. Hinoon, si Galvez ug si Health Sec. Francisco Duque III ang mga unang tupukan sa mapiling bakuna aron modako ang pagsalig o kompyansa sa katawhan nga ang maong bakuna luwas ug epektibo alang sa mga katawhan.
Ang kompanyang Russian nga Gamalaya mitug-an nga andam sila nga makabaligya sa Pilipinas ug mga 15 to 20 million ka mga doses sa bakuna karong unang kwarter sa 2021.
Andam usab ang AstraZeneca mobaligya ug mokabat sa 2.6 million dosea ug padayon ang negosasyon alang sa dugang nga 20 million doses sa bakuna mga ibaligya sa maong kompanya. Gilaraw nga muabot ang supply karong umaabot Mayo 2021.
Nagpadayon gihapon ang negosasyon sa laing mga kompanya sama sa Pfizer, Sinovac, ug Moderna, matud pa sa mga taho.