Mimando si Presidente Duterte sa mga tinugyanan sa edukasyon nga dili magpahigayon ug face to face classes tungod kay mitumaw ang bag-ong strain sa Coronavirus disease (Covid) virus.
Matud pa ni Kalihim sa Edukasyon Leonor Briones nga ipatuman sa Department of Education (DepEd) ang mando sa presidente tungod sa mga bag-ong mga panghitabo.
Kabahin niini, mipadayag usab si Sen. Christopher Lawrence “Bong” Go nga dili siya kampante nga idayon ang face to face classes sa sunod bulan kay wala pa man ma apod-apod ang bakuna batok sa Covid. Midugang siya pag-ingon nga nanggawas ang mga balita nga adunay bag-ong strain sa virus nga maoy hinungdan sa sakit nga Covid.
Kanunay muhangyo si Go sa mga tinugyanan sa edukasyon nga hinuktukan ug maayo ang maong plano kabahin sa face to face classes tungod sa dakong hulga nga dala sa bag-ong strain sa Covid virus ug kuyaw nga matakdan ang mga tinun-an ug mga magtutudlo apil na ang mga komunidad nga duol sa mga tunghaan.
Sumala pa ni Go nga dili angayan sugdan ang face to face classes kon wala pay bakuna.
Dugang pa niya nga delikado kaayo nga mahatagan ug risgo ang kahimsog sa panglawas sa mga kabataan. Angayan lang nga hinuktukan pag-usab sa kagamhanan ang maong plano alang sa kaluwasan katilingban.
Sumala pa sa senador nga labing mahinungdanon mao ang kinabuhi sa tawo kon itandi sa pagpahigayon nga sa pilot testing sa face to face classes.Kahinumduman nga misugot si Duterte niadtong Dis. 16, 2020 nga ipahigayon sa DepEd ang pilot testing sa face to face classes sa piniling pampublikong tunghaan sa tibuok nasud.
Tungod niining maong kamandu-an, dili na madayon ang face to face classes sa unom ka tunghaan sa Bohol
Gitaho sa superintendent sa Bohol division of schools nga si Dr. Bianito Dagatan nga dili na mahinayon ang laraw diin unom ka mga pampublikong tunghaan sa Bohol ang unta apil sa pilot testing sa face to face classes nga sugdan sa sunod bulan.
Gitaho mismo ang bag-ong katikaran pinaagi sa usa ka pakighinabi sa radyo niadtong Lunes, Dis. 28, 2020 sa tulumanong Open Forum nga gipasiugdahan ni Ardy Araneta-Batoy ug Dave Albarado.
Atong mahinumduman nga supak si Presidente Duterte sa pagpahigayon ug face-to-face classes na limitado tungod kay adunay bag-ong strain sa Coronavirus disease (Covid) ang mitumaw ug naghatag ug bag-ong bahad sa kasanihan sa publiko.
Tungod kay dili na madayon ang limitadong face-to-face classes, padayon ang mga bata sa ilang pagtuon pinaagi sa mga module.
Giklaro ni Dagatan nga kon nahinayon ang face-to-face classes, nagkinahanglan ug pagtugot ang mga ginikanan aron makaapil ang tinun-an.
Nunot niini, ang usa ka tinun-an mosulod lang sa tunghaan ka duha sa usa ka semana ug ang klase molungtad ug dili momenus sa tunga sa adlaw.
Nasayran usab nga mahimo nga tulo ka activities ang kompletohon sa bata ug dili na kinahanglan tubagon ang tanang activities sa usa ka subject sa module.Gisaad usab ni Dagatan nga ipahibalo sa mga magtutudlo kon nahatag na ang feedback sa mga ginikanan kabahin sa mga sayop sa module kon ang mga sayop gitaho na sa mga tinugyanan.