Ni Padre Jose “joesum” Sumampong, Jr.
Enero 10, 2021
Pagbunyag sa Ginoo (B)
EBANGHELYO (Markos 1: 7-11)
1Ang wali ni Juan ngadto sa katawhan mao: “Ang tawo nga moanhi sunod kanako mas gamhanan kay kanako. Dili ako takos bisan gani paghubad sa higot sa iyang sandalyas. 8Nagbunyag ako kaninyo sa tubig, apan siya magbunyag kaninyo sa Espiritu Santo.” 9Wala madugay, miabot si Jesus gikan sa Nazaret, sa lalawigan sa Galilea, ug gibunyagan siya ni Juan didto sa Suba sa Jordan. 10 Sa paghaw-as ni Jesus gikan sa tubig, nakita niya nga nabukas ang langit ug mikunsad kaniya ang Espiritu Santo sa dagway sa usa ka salampati. “Unya may tingog gikan sa langit nga nag-ingon, “Ikaw ang pinangga kong Anak. Nahimuot ako pag-ayo kanimo.” Ang Ebanghelyo sa Ginoo.
oOo
KAHULOGAN SA EBANGHELY0 (Markos 1: 7-11)
7aAng wali ni Juan ngadto sa katawhan mao: “Ang tawo nga moanhi sunod kanako mas gamhanan kay kanako…”
Dinhi mapamatud-an nga si Jesus mao gayod ang manluluwas. Kini mao ang gipaila ni Juan nga Magbubunyag. Si Juan naghagit kanato sa pagpangandam.
7b “Dili ako takos bisan gani paghubad sa higot sa iyang sandalyas.”
Sa sinugdan pa sa Ebanghelyo sumula ni Markos, gitug-an na ang pagka-kahibulongan sa pagka-tawo ni Jesus. Gipaila si Jesus, sumala sa pulong ni Juan, ang iyang pagka-gamhanan. Bisan pa sa pagka-inila ni Juan niining tungora, siya mismo miangkon nga dili siya angay bisan gani sa paghubad sa higot sa sandalyas ni Jesus.
8Nagbunyag ako kaninyo sa tubig, apan siya magbunyag kaninyo sa Espiritu Santo.”
Tulo ka mga higayon nga gisaysay ang Espiritu Santo sa unang kapitulo sa Ebanghelyo sumala ni Markos (Markos 1:8; 1:10; ug 1:12). Sa pagpaminaw sa mga katawhan sa gipamulong ni Juan, sila nahinumdum sa mga gitagna sa mga propeta mahitungod sa Mesiyas nga modawat sa Espiritu Santo (Isaias 11:1-3; 42:1; 61:1). Kining maong Mesiyas mobubo sa maong Espiritu ngadto sa mga katawhan (Isaias 44:3; 59:21; Exequiel 11:19; 36:25-29; Joel 3:1).
Si Juan masaligon nga mipahibalo sa nagkaduol nga katumanan sa maong mga saad sa propeta.
“… siya magbunyag kaninyo sa Espiritu Santo.” Mao ba kini ang kanunay natong gihinumduman sa atong Kristohanong pagka-binunyagan?
Nasabtan ba gayod nato ang papel sa Espiritu Santo sa atong Kristohanong kinabuhi? Nasayran ba nato ang pagtulun-an mahitungod sa Espiritu Santo—nga ang tinuod nga dignidad sa tawo wala diha sa atong pagka-tawo, kondili diha lamang sa pagbukas sa atong kaugalingon sa mas labaw nga gahum nga Iya sa Espiritu Santo.
9Wala madugay, miabot si Jesus gikan sa Nazaret, sa lalawigan sa Galilea, ug gibunyagan siya ni Juan didto sa Suba sa Jordan.
Ania na si Jesus nga sa unang higayon gipahimutang sa taliwala sa saysay sa Ebanghelyo sumala ni Markos.
Kini si Jesus, nga nag-edad na og katloan (30) sa tuig, sa hilom nagpuyo sa dili-inilang lungsod sa Nazareth. Matud pa aduna lamay gibanabang kawhaan (20) ka mga balay nga didto mahimutang sa Nazareth. Gikan sa iyang pagka-dili-inila, ania na si Jesus migimaw ug magsugod sa iyang buluhaton nga may dakong epekto sa kausaban o kabag-ohan sa kasaysayan sa kalibutan.
Kinsa man kini si Jesus? Sa sinugdan daw usa lamang ka yano nga tawo. Gani midawat siya sa bunyag sa pasaylo sa sala.
10aSa paghaw-as ni Jesus gikan sa tubig, nakita niya nga nabukas ang langit…
Nabukas ang langit! Usa ka bug-at o makahuloganong pulong nga Griego.
Ang tawo man gud adunay kinaiya nga magtakuban sa kaugalingon. Si Jesus mao ang mobukas sa siradong nahimutangan kanato. Tungod ni Jesus ang atong tawhanong kinaiya bukas na sa balaanong kinaiya; ang atong pagkayutan-on bukas na sa pagka-langitnon.
Susama sa nahitabo sa panahon ni Isaias, ang propeta naghangyo sa Ginoo nga siya dili magpabiling hilom taliwala sa nagkalawom nga kasakitan ug kapaitan sa mga katawhan.
Aron dugang nga masabtan kining maong kamatuoran basaha ang Isaias 64:1.
10bug mikunsad kaniya ang Espiritu Santo sa dagway sa usa ka salampati…
Sa Ebanghelyo ni Markos mao kini ang unang pagpadayag sa kinabuhing publiko ni Jesus. Ang labing una nga aksyon ni Jesus mao ang pagkakitag talan-awon nga si Jesus lamang usab ang nakasaksi. Tingali usa ka talan-awon nga nahitabo sa kinahiladmang bahin sa pagka-tawo (inner) ni Jesus. Dinhi nagkalawom ang pagtugkad ni Jesus sa iyang pagka-Anak sa Dios ug sa pagsabot sa iyang misyon.
Bisan pa kon sa iyang pagka-Dios wala siyay sinugdanan, apan tungod sa iyang pagka-tawo, dili malalis nga nagkaanam usab ang iyang pagpakakaplag sa iyang kaugalingon—kon kinsa Siya!
10c“Unya may tingog gikan sa langit nga nag-ingon, “Ikaw ang pinangga kong Anak. Nahimuot ako pag-ayo kanimo.” Usa kini ka talagsaong kasinatian sa hilabihang kasuod gumikan sa gugma gikan sa iyang Amahan. Si Jesus nasayod nga siya gihigugma. Kining gugmaha makit-an diha sa iyang pagtawag og “Abba!” o “Amahan!” (Markos 14:36).