Sinulat ni Rey Anthony Chiu
Did-an gayud sa nasud ang ilegal nga pagsulod sa mga bakuna nga walay pagtugod sa Food and Drugs Administration (FDA).
Kini ang pagpatin-aw sa kagamhanan human gipasanginlan nga nagdumili sa pagpasulod sa mga bakuna ang mga tinugyanan sa nasud.
Matud pa sa mga patakatan, ang mga kompanya nga nanag-iya sa mga bakuna nga musulod sa nasud, kinahanglan pa nga matugotan sa nasud human makakuha sa pagtugot, nga gitawag ug Emergency Use Authorization (EUA) alang sa ilang mga bakuna batok sa COVID-19 dinhi sa Pilipinas.
Nunot niini, si Presidential spokesperson Harry Roque mipadayag nga si FDA Director-General Rolando Domingo mibutyag ngadto sa mga sakop ka kabinete ni Presidente Duterte sa tigum niini sa Malacañang nga ang kompanya nga Pfizer miduso na sa ilang aplikasyon sa FDA alang sa EUA niadto pang Disyembre 23.
Matud pa sa usa ka pahayag ni Sec Roque, mokabat pa sa 21 ka adlaw ayha pa ang FDA makahimo ug pagtimbang timbang aron kaaprobahan ang application sa EUA, apan bisan pa kon maaprobahan na, dili dayon makasugod ang paggamit sa bakuna hangtud nga mahidangat na kini sa nasud.
Sumala pa sa FDA, ang tanang kompanya nga aplikante sa EUA, kinahanglang musangat sa FDA sa mga dokumentos ug pagtuon lakip na ang mga EUA nga nakuha usab sa kompanya gikan sa mga nasud nga didto gihimo ug gipagamit na ang bakuna, sa dili pa kini ikapagamit sa Pilipinas.
Kini nga mga datus maoy gamiton sa FDA sa ilang paghatag sa pagtugot.
Segun pa sa FDA, human sa 21-28 ka adlaw nga pagtimbang timbang sa mga eksperto sa nasud, matugotan na kini sa Enero 2021 pohon apan nagtuo ang kadaghanan nga sa Marso 2021 na gayud kini makasugod sa pagpangbakuna human e-deliver nganhi ang bakuna.
Kini usab ang timeline haum sa gimando ni Presidente Duterte nga ang mga bakuna kinahanglan nga ania na ug magamit na sa dili pa ang ikaduha nga kwarter sa 2021
Gani, gibutyag usab ni Roque ang Pilipinas moangkat sa bakuna nga gina sa SinoVac nga gikan sa China.
Moangat usab ang Pilipinas ug bakuna nga gihimo sa Pfizer gikan sa US, sa AstraZeneca nga gikan sa Britanya ug sa Sputnik V nga gikan sa Russia.
Kasamtangan nga adunay 2.6 ka milyon ka dosage na ang mahimong mahidangat dinhi sa Pilipinas samtang nagpadayon na usab ang mga pre-purchase procedures sa ubang bakuna, taho pa ni Roque.