Sinulat ni Dave Albarado gikan sa taho sa PIA
Gipirmahan ni Presidente Duterte ang balaod nga naghatag ug emergency powers kaniya batok sa red tape diin gihimo nga mas dali ang pagproseso sa mga lisensya, permits, ug mga certifications gikan sa nasudnon o lokal nga kagamhanan sa panahon nga anaa ang Pilipinas sa usa ka national emergency.
Ang balaod nga naila nga Republic Act 11517 naghatag ug gahum sa presidente nga mas paspas ang pagpagawas sa mga lisensya, permit o certification.
Tungod sa pagpirma sa presidente, nalipay pagayo si Senate Majority Leader Juan Miguel Zubiri nga maoy sponsor ug usa sa mga co-author sa maong balaod.
Matud pa ni Zubiri tungod sa bag-ong balaod dili na maglisod ang katawhan nga molukat ug kinahanglang mga papeles gikan sa kagamhanan ilabi na sa panahon sa pandemya.
Tungod kay anaa pa ta sa pandemya, kinanglan nga ang mga proseso sa kagamhanan mahimong mas paspas o sayon aron makadawat ug tukmang serbisyo ang katawhan nga naglisod tungod sa emergency o sa mga katalagman susama sa pandemya nga atong nasinati.
Kining balaod mahimong partner sa Ease of Doing Business law diin gihimong paspas ang pag-aprobar sa kagamhanan sa mga lisensya, permit o certification sa panahon sa emergency.
Sa Ease of Doing Business law, ang paglukat ug mga papel gikan sa kagamhanan mahimo nga makuha sulod sa lima, pito, o 20 ka adlaw depende sa klase sa papeles. Sa bag-ong balaod, mas dali ug paspas na ang paglukat ug mga papeles sama sa mga permit, lisensya o certification.
Sumala pa ni Zubiri makatabang ang maong balaod aron madali ang pagsulbad sa mga problema nga dala sa pandemya.