Sinulat ni Dave Albarado gikan sa taho sa CNN Philippines
Giingong musaka ug 15 ka beses ang mga kaso sa Coronavirus disease (Covid) dinhi sa Pilipinas kon makasulod ang bag-ong matang sa Covid virus sulod lang sa usa ka bulan.
Matud pa ni Dr. John Wong ang founder sa Institution of Epimetrics, diin apil siya sa technical working group nga nagtuon sa mga mutations sa maong virus, nga kusog makatakod ang bag-ong matang sa Covid nga nakaplagan didto sa United Kingdom.
Gipasabot niya nga kon hisgutan ang unang matang sa Covid virus, kon adunay 20,000 ka mga kaso nga ang hinungdan mao ang unang variant sa virus, sa sugod sa bulan, mahimong mahuman ang bulan nga anaa sa 32,000 ang gidaghanon sa mga kaso.
Kon ang bag-ong matang sa Covid virus ang manakod, kon magsugod ang bulan sa 20,000 ka mga kaso, mahuman ang bulan nga adunay 300,000 ka gidaghanon sa mga kaso.
Nagpakita lamang kini nga kusog kaayo manakod ang bag-ong matang sa Covid virus.
Tungod sa posibleng pagsaka sa mga kaso nga ang hinungdan mao ang bag-ong matang sa virus, adunay posibilidad nga mudaghan ang mga kaso nga maoy hinungdan sa kalisod nga masinati sa mga healthcare workers ug mga tambalanan.
Hinoon, wala pay ebidensya nga makaingon nga mas makamatay ang bag-ong matang sa virus.
Sumala pa ni Dr. Marissa Alejandria, sa Philippine Society for Microbiology and Infectious Disease (PSMID), bisan adunay bag-ong matang sa virus, nagpabilin nga pareho gihapon ang paagi sa paglikay aron dili matakdan.
Mao iyang gipasabot nga kinahanglan adunay physical distancing, ug mag sul-ob ug face mask ug face shield, inubanan sa kapunay nga paghumaw sa kamot gamit ang tubig, sabon o kaha alcohol.
Dugang ni Wong nga likayan ang mga lugar diin adunay bagang duot sa katawhan ug ang mga lawak igo gayud ang ventilation.
Dugang ni Wong, gipahimangnoan ang tanan nga magpakonsulta sa doktor kon adunay mga sinotomas susama sa trangkaso o kalintura.