Sinulat ni Elvira Bongosia
Target sa gobyerno nga mabukunahan batok sa sakit nga Coronavirus disease ang 50 ngadto sa 70 ka milyong mga Pilipino sulod ning tuiga.
Kini ang gibutyag ni National Task Force (NTF) Against Covid chief implementer ug vaccine czar Kalihim Carlito Galvez Jr., atol sa gipahigayong Laging Handa Briefing: COVID-19 Vaccines Explained niadtong Enero 6, 2021, didto sa Philippine Information Agency (PIA) Auditorium sa kaulohan.
Matud pa ni Galvez nga ang nasud anaa na sa ‘advanced stages of negotiations’ uban sa Novavax, Pfizer, ug Johnson&Johnson sa Estados Unidos; AstraZeneca sa United Kingdom; Sinovac Biotec sa China; ug Gamaleya Research Institute sa Russia.
Masaligon si Galvez nga adunay nga mahipno gayud ang kasabutan tali sa Pilipinas sa mga kompanya nga tig gama ug bakuna sa dili madugay.
Gidugang pa niini nga ang gobyerno makadawat ug ‘fully subsidized doses’ gikan sa Covax Facility alang sa unang 20 porsyento sa populasyon o 22 milyon ka mga Pilipino.
Matud pa nga plano sa gobyerno nga mopalit ug dili moubos sa 148 ka milyong doses sa bakuna batok sa Covid aron maapil ang 70 ka milyong Pilipino.
Si Galvez, kauban ang ubang opisyal sa gobyerno atol sa maong briefing miseguro sa publiko nga ang gobyerno naghimo ug mga ‘scientific evaluations’ aron pagseguro nga luwas, epektibo ang libreng bakuna batok sa Covid ang mahatag sa tanang Pilipino.
Si Galvez nagkanayon nga ang halapad nga ‘nationwide vaccination program’ naka-angkla sa Philippine National Vaccine Roadmap, diin tumong niining makab-ot ang hingpit nga pagbawi sa ekonomiya ug kinabuhi sa katawhang Pilipino.
Gipasa ni Galvez ang mensahe ni Presidente Rodrigo Duterte nga tanan mahatagan ug higayon nga mabakunahan.
Gibutyag sa kalihim nga ang Pilipinas ug Colombia maoy unang duha ka nasud nga mosalmot sa Solidarity Vaccine Trial sa World Health Organization (WHO).