Ni Padre Jose “joesum” Sumampong, Jr.
Enero 17, 2021
Sto. Niňo (B)
EBANGHELYO (Markos 10:13-16)
13May pipila ka tawo nga nagdala og mga bata ngadto kang Jesus aron sila hikapon niya, apan gikasab-an sila sa mga tinun-an. 14Sa pagkaalinggat ni Jesus niini, nasuko siya ug miingon sa iyang mga tinun-an, “Paaria kanako ang mga bata. Ayaw silag did-i, kay ang Gingharian sa Dios ila sa sama niining mga bata. 15Timan-i ninyo kini: ang dili modawat sa paghari sa Dios sama sa usa ka bata, dili mahisakop niini.” 16Unya iyang gipangugos ang mga bata, gitapion ang iyang mga kamut kanila, ug gipanalanginan sila. Ang Ebanghelyo sa Ginoo.
oOo
KAHULOGAN SA EBANGHELYO (Markos 10:13-16)
13May pipila ka tawo nga nagdala og mga bata ngadto kang Jesus aron sila hikapon niya, apan gikasab-an sila sa mga tinun-an. 14aSa pagkaalinggat ni Jesus niini, nasuko siya… 16Unya iyang gipangugos ang mga bata, gitapion ang iyang mga kamut kanila, ug gipanalanginan sila.
Ang tulo ka mga Ebanghelista may saysay kabahin niining maong panghitabo: Markos (10:13-16), Mateo (19:13-15), ug Lukas 18:15-17). Nindot nga kon atong susihon pag-ayo ang ilang mga saysay, si Markos lamang ang mitaho nga si Jesus nasuko. Ug sa katapusang bahin sa saysay, si Markos ra usab ang miingon nga si Jesus mikugos sa mga bata.
Kini nagpakita kanato sa hilabihang “pagkatawo” o “humane” ni Jesus. Siya naghupot sa usa ka kinaiya nga susama usab sa unsay atong gihuptang kinaiya: Nga kon adunay dili maangayan posible nga bation uban niini ang kasuko… apan usab kon makaangay makapakita sa pagbati sama sa pagkamalulot, pagkamahigugmaon, pagkamabination.
Ang una, gipakita ni Jesus sa iyang kasuko, ug ang ikaduha, iyang gipakita sa iyang pagpangugos sa mga kabataan.
Tataw usab nga iyang gipadayag kini sa dakong kalainan sa unsay reaksyon sa mga Apostoles: sa ilang pagkasaba sa mga bata.
Si Jesus nagtudlo kanato sa usa ka pagtulun-an nga angay natong ipakita ngadto sa mga kabataan: nga sila angayan nga higugmaon, nga sila angayang kuguson, nga sila angayan sa atong paglaban.
Alang kang Jesus, walay tawo nga walay bili, bisan pa sa kagamay, sa hilabihang kahuyang, sa pagka-walay panalipod sa kaugalingon. Bisan pa ang mga “daw-way-buot” nga mga bata balaan alang kang Jesus.
14bug miingon sa iyang mga tinun-an, “Paaria kanako ang mga bata. Ayaw silag did-i, kay ang Gingharian sa Dios ila sa sama niining mga bata.
Ang gugma ni Jesus alang sa mga kabataan dili pagaisipon nga usa lamang sa kinaiyang pagkamadanihon. Kondili ang maong pagpakita sa maong gugma maoy usa ka pahayag sa teolohiya: Nga alang kang Jesus ang gingharian sa Dios wala lamang magalakip sa mga hamtong. Ang mga kabataan apil ug makasulod niini. Ang mga kabataan aduna nay kalabotan sa tinuoray nga pagpakigsuod kang Jesus.
Ang kanhing katilingban nga gisaysayan ni Markos sa Ebanghelyo niadtong panahona naglantugi na sa usa ka isyu nga gilantugian usab sa pipila ka mga dapit sulod sa atong panahon karon. Ang isyu mao kini: Kinahanglan ba gayod ang paghatag og bunyag ngadto sa mga gagmayng bata? Mahimo ba sa mga bata nga makaapil sa mga liturhikanhong kasaulogan? Mahimo ba nga ang mga gagmayng mga bata ipalabot sa kinabuhi sa Kristohanong katilingban? Makaapil na ba sila sa kahiusahan sa Eyukaristiya?
Angay usab nga atong mahibaloan nga ang mga Hudio niadtong panahona wala kaayo magahatag og dakong bili sa mga kabataan samtang gagmay pa sila. Ang ilang pag-apil sa mga kasaulogan sa sinagoga anha pa magsugod kon sila nagpanuigon na og napulog-duha ka tuig. Ug sa katilingbang Romanahon diin sa Markos nahiuban, ang kahimtang sa usa ka bata anaa pa sa hingpit nga pagsalig sa mga hamtong.
Niining maong mga naandang kalihokan sa maong mga katilingban, ang gipakita ni Jesus mao ang pagbarog “alang sa mga kabataan.”
Lawom ang kahulogan sa iyang gipakita ngadto sa mga kabataan: Ang mga bata dili pagaisipon nga walay hinungdan, kondili nga ang bata usa na ka matuod nga tawo. Ug alang sa mga mata sa Dios, ang bata adunay walay utlanang bili. Gipamatud-an kini sa daghan sa mga gipamulong ni Jesus.
15Timan-i ninyo kini: ang dili modawat sa paghari sa Dios sama sa usa ka bata, dili mahisakop niini.”
Dili lamang kay ang usa ka bata makahimo pagsulod sa relasyon tali sa Dios, apan usab siya gihimong usa ka modelo alang sa mga hamtong!
Atong sulayan sa pagsabot ang lawom nga kahulogan niining maong texto.
Dili kini usa ka awhag nga ang mga hamtong “magbinata”. Dili usab kini paga-isipon nga usa lamang ka buluhaton sa paghanduraw o balik-lantaw sa pagka-inosente ug pagka-maputli sa atong kaugalingon sa dihang gagmayng bata pa kita.
Hinoon usa ka awhag sa pagsulod sa usa ka relasyon tali sa kaugalingon ug sa Dios diin anaa ang hingpit nga “pagsalig” nganha Kaniya. Ang bata maoy timaan sa “hingpit sa pagsalig”, sa “hingpit nga pagsugot”, sa usa nga andam sa tanang higayon sa pagsanong.
Ang gagmayng bata dili manggidudahon. Motugyan siya sa hingpit ug sa walay pagpugos, walay daghang sulti, walay pagbagutbot. Ang mga hamtong, sa laing bahin, sagad mahisalaag gumikan sa hilabihang paghatag og rason.
Ang bata nga diha sa hunahuna ni Jesus isip modelo sa mga hamtong mao kadtong bata nga walay kahadlok nga magpagakos sa iyang inahan, uban sa bug-os nga pagsalig kaniya—bisag unsay iyang buhaton. Ang bata dili mabuhi kon walay paghigugma ug pag-amuma gikan sa uban. Nabuhi siya gumikan sa maong gugma. Ang kahimtang ug kinabuhi sa usa ka gamayng bata anaa magasukad sa maong matang sa gugma—gugma nga usa ka gasa gikan sa uban.
Ug si Jesus mitudlo kanato: Sama unta sa usa ka bata ang atong pagtagad sa atong langitnong Amahan. Kini maoy usa ka isyu nga nagdala og kinabuhi o kamatayon: “Ang dili modawat sa paghari sa Dios sama sa usa ka bata, dili mahisakop niini.”
Ang pagkasama sa usa ka bata usa ka grasya ug gasa!
+++++++
AKONG MGA PAHALIPAY SA MGA NANGULONG-ALAGAD UG MGA GINSAKOPAN SA HOLY INFANT COMMUNITIES – HIC ATOL SA ILANG KAPYESTAHAN!