Sinulat ni Dave Albarado gikan sa taho sa PIA
Giawhag ni Sen. Christopher Lawrence “Bong” Go ang kagamhanan nga palig–onon ang kumpyansa sa mga Pilipino sa pagbakuna batok sa Coronavirus disease (Covid) pinaagi sa insaktong pagpasabot sa mga plano ngadto sa publiko.
Kinahanglan dili mahadlok ang mga Pilipino nga magpatupok sa bakuna nga napamatud-an nga luwas ug epektibo, matud pa ni Go.
Dugang pa niya nga naningkamot ang kagamhanan nga makakuha ug igong gidaghanon, epektibo, ug luwas nga bakuna ug ipasabot sa katawhan ang mga lakang nga gipanghimo sa kagamhanan tungod kay ang makabenepisyo sa pagpabakuna mao man ang nasud aron makalingkawas kitang tanan sa krisis.
Kon ang katawhan masayod sa kamatuoran sa bakuna, mas sayon ang pagpukan sa sakit nga Covid, dugang pa ni Go.
Kinahanglan mahatagan ang matag Pilipino ug tukmang impormasyon kabahin sa bakuna aron dili sila mahadlok magpatupok kon moabot ang mga bakuna sa nasud, sumala pa ni Go.
Kinahanglan sigurohon sa kagamhanan ang insaktong pag apod-apod sa mga bakuna sa panahon nga kini anaa na sa nasud, dugang nga sulti ni Go.
Daghang mga tinubdan sa bakuna ang gisabot sa kagamhanan aron maseguro ang luwas nga mga bakuna nga ipang apod-apod sa katawhan.
Gimandoan ni Presidente Duterte ang director general sa Food and Drug Administration nga mopagawas ug Emergency Use Authority (EUA) alang sa mga bakuna batok sa Covid. Pinaagi sa EUA, mas dali ang pagtugot sa paggamit sa mga bakuna nga magagikan sa gawas sa nasud.
Bag-ohay lang, mitaho si vaccine czar Sec. Carlito Galvez Jr., nga mi-apply ang Pfizer-BioNTech ug EUA. Mi-apply usab ug EUA ang AstraZenica ug ang Gamaleya Research Institute sa Russia. Ang uban pang mga kompanya nga mi-apply ug EUA mao ang Sinovac, Sinopharm, Moderna ug Bharat Biotech.