Sinulat ni Elvira Bongosia
Ang gobyerno sa Pilipinas nga gi-representahan ni National Task Force (NTF) Against COVID-19 chief implementer ug vaccine czar Kalihim Carlito Galvez Jr., ug ang Serum Institute of India (SII) ug Faberco Life Sciences, Inc., milagda ug kasabotan niadtong Enero 9, 2021 sa pagkuha ug suplay sa 30 ka milyong dose sa Coronavirus disease vaccine nga Covovax.
Matud pa ni Kishore Hemlani, ang founder sa Faberco Life Sciences Inc., ang SII partner sa Pilipinas, nga ang kasabutan nga napirmahan usa kini ka milestone sa relasyon sa India ug Pilipinas, ug napakita nga adunay maduolan ang Pilipinas nga higala nga andam nga motabang.
Ang SII, ang labing dako’ng vaccine manufacturer sa tibuok kalibotan, nagkig-partner sa Novavax,nga usa ka US-based biotechnology nga kompanya alang sa development ug commercialization sa Covovax nga bakuna.
Kining bakuna adunay recombinant coronavirus spike protein nanoparticle ug Novavax-patented Matrix-M nga pangtabang sa paglig-on sa ‘immune response’ ug makapadasig sa taas nga matang sa ‘neutralizing antibodies’.
Ang Covovax anaa karon sa third-stage trials ug gipaabot nga ma-aprobahan aron magamit sa international regulators.
Matud pa ni Faberco Life Sciences Medical Director Dr. Luningning Villa nga ang bakuna gamiton sa 15 ka milyong kabos ug kadtong daling matakdan sa sakit nga mga Pilipino.
Gitubyag usab niini nga ang maong bakuna stable sa 2°C ngadto sa 8°C, ang standard nga temperatura nga nahisulod sa ‘existing cold chain system’ sa Pilipinas, diin gitugot ang distribusyon niini sa pinakalayong mga barangay.
Ang kandidatong bakuna hugot nga gisusi karon sa nagkalain-laing lugar, age groups, mga grupong labing apektado sa Covid, apil na ang mga may HIV, ug ‘racial and ethnic minorities.’
Ang clinical trials maglakip sa kadaghanan sa populasyon nga mga 50,000 ka subjects aron pagseguro sa ‘extreme robust clinical data’ sa wala pa ang pag-uyon sa mga may kalabutang regulatory bodies nga naglakip sa World Health Organization (WHO).
Ang bakuna gipaubos sa initial phase sa clinical trials sa Australia, South Africa ug India. Ang phase-three trial kasamtangang gipahigayon sa United Kingdom nga adunay 15,000 ka subjects ug nagpadayon usab sa Estados Unidos ug Mexico nga may 30,000 usab ka subjects.
Ang presyo sa bakuna gipaabot nga ipagawas sa dili madugay tali sa gobyerno ug SII, diin gipaabot nga maghatag usab kini ug epektibo, luwas ug baratong bakuna sa tibuok kalibotan sama sa mga niaging panahon. Ang SII usa ka kasaligang supplier sa nagkalain-laing bakuna sa Pilipinas, ilabi na ang gigamit sa Expanded Program for Immunization sa gobyerno.
Ang Faberco Life Sciences, Inc., usa usab ka partner sa SII alang sa mga nag-unang programa sa bakuna sa nasod sama sa Inactivated Polio vaccine, Rotavirus vaccine, Pneumococcal Conjugate vaccine, gawas pa sa Covid vaccine.