Sinulat ni Dave Albarado gikan sa taho sa PIA
Mokabat sa 350 ka mga grupo sa overseas Filipino workers (OFW) nga nagbase sa Asia, Europe, the Middle East, and North America ang misalmot sa usa ka online forum nga gipahigayon sa United Filipino Global nga nahitabo niadtong miaging Sabado, Enero 9, 2021. Ang katuyuan niining maong online forum mao ang pagpasabut ug pagtuki sa gitawag ug sugyot balaod kabahin sa pagmugna sa Department of Overseas Filipinos (DOFil).
Ang DOFil usa ka gisugyot nga departamento sa nasudnong kagamhanan aron panalipdan ang kahimtang ug katungod sa mga OFW nga atua sa gawas sa nasud.
Isip pinasidunggang dinapit, gibutyag ni Sen. Christopher “Bong” Go nga kinahanglan gayud ang DOFil aron mapanalipdan ang mga katungod sa mga OFW ug mahatagan ug insaktong pagtagad ang mga suliran nga giatubang sa mga Pilipino nga anaa sa gawas sa nasud. Mokabat sa 10 porsyento sa mga Pilipino anaa sa gawas sa nasud nanarbaho o nagpuyo.
Dugang pa ni Go nga iya gayud iduso ang maong sugyot balaod aron ang kahimtang sa mga Pilipino mahatagan ug pagtagad bisan asa pa man siya sa kalibutan nahimutang.
Gisulti ni Go nga apektado ug maayo ang mga OFW sa hagit nga gidala sa Coronavirus disease (Covid) nga miresulta sa pagpauli sa daghang mga OFW balik ngari sa nasud.
Ang mga mibalik nga OFW kasagaran nawad-an usab ug panginabuhi didto sa gawas sa nasud, ug nagkinahanglqn ug tabang gikan sa kagamhanan.
Ang sugyot balaod ni Go nga gi-file niadtong Dis. 14, 2020 mao ang ikatulong bersyon sa maong sugyot balaod ug gisertipikahan ni Presidente Duterte nga usa ka “urgent” (kun dila-ian) nga sugyot balaod nga kinahanglan nga tukion sa Kongreso.