Sinulat ni Elvira Bongosia
Gilagdaan ni Presidente Rodrigo Roa Duterte ang upat ka balaod apil ang Republic Act No.11509 o ang Doktor Para sa Bayan Act.
Tumong niining balaod nga itukod ang medical scholarship ug moalagad sa nasud ang mga makalampos nga estudyante.
Hatagan ug prayoridad sa balaod ang mga kwalipikadong aplikante sa mga probinsya nga walay doktor ang gobyerno o government physicians aron masiguro nga magbaton ug bisan usa ka doktor sa matag munisipalidad sa nasud.
Gilagdaan usab sa Presidente ang balaod kalabot sa Alternative Learning System sa basic education alang sa mga out of school nga mga kabataan, mga special cases, adults, ug mga indigenous peoples (IPs).
Gigarantiya sa Republic Act No.11510 ang ‘equitable access’ alang sa tanang mga tinun-an kauban sa mga estudyante nga nagpuyo sa mga lugar nga lisud maabot ug ubang “conflict-affected communities.”
Gilagdaan usab ni Duterte ang Republic Act No. 11511 diin gi-amyendahan ang Section 2 sa Republic Act No. 10068 o ang Organic Agriculture Act of 2010. Gi-update ang Section 2 ug gidugang ang pagsaka sa kitaon sa mga mag-uuma ug pag-promote sa food self-sufficiency sa declaration of policy.
Katapusang gilagdaan sa Presidente ang Republic Act No. 11517 diin gitugotan ang Presidente sa Pilipinas nga paspasan ang processing ug issuance sa national ug local permits, licenses, certification sa panahon sa national emergency o anti-red tape law.