Sinulat ni Dave Albarado
Andam sulbaron ni Gob. Arthur Yap ang problema sa mahal nga presyo sa lana labi na dinhi sa dakbayan sa Tagbilaran pero iya unang hulaton ang mga katapusan sa mga imbestigasyon nga gihimo sa Sangguniang Panlalawigan ug Sangguniang Panglungsod sa Tagbilaran.
Tungod kay anaa pa ang mga imbestigasyon, dili lang una manghilabot ang gobernador sa maong isyu ug pasagdan niya ang mga hingtungdan sa industriya sa lana nga maoy mohatag sa hinungdan ngano mahal ang lana sa Tagbilaran kon itandi sa mga laing lungsod sama sa Dauis, Panglao o didto sa lungsod sa Ubay.
Matud pa sa gobernadorn nga posible nga usa sa mga hinungdan nganong mahal ang lana dinhi sa dakbayan kay tungod sa kanihit sa mga storage facilities. Ang ipasabut niini mao na gamay lang ang kapasidad sa ilang sudlanan kun kanang gitawag nato ug depot. Tungod niini dili igo ang supply sa lana nga i-deliver gikan sa kauluhan o laing dapit padulong sa probinsya.
Ang gitawag ug “Lay of Supply and Demand” mao usab ang laing posibleng hinungdan nganong mahal ang lana dinhi.
Andam si Yao nga ang probinsya maoy magtukod sa mga depot nga paabangan sa mga kompanya sa lana kon ang mga kompanya dili andam nga magtukod ug depot dinhi aron makaapas ang supply sa demand sa Bohol.
Tungod kay gamay ang storage capacity dinhi magsige ug deliver ug supply sa lana sa atong dapit nga maoy hinungdan ngano magmahal ang gasolina.
Hinoon, walay lakang nga himoon ang gobernador hangtud dili pa matiwas ang mga imbestigasyon nga gihimo sa duha ka mga hut-ong: ang hut-ong sa lalawigan ug ang huto-ong sa dakbayan.