Ni Padre Jose “joesum” Sumampong, Jr.
Enero 24, 2021
Ika-Tulo nga Domingo sa Tuig (B)
EBANGHELYO (Markos 1:14-20)
14Sa dihang nabilanggo na si Juan, miadto si Jesus sa Galilea ug nagsangyaw sa Maayong Balita sa Dios. 15Miingon siya, “Miabot na gayod ang panahon nga maghari na ang Dios! Busa hinulsoli ug biyai ang inyong mga sala ug tuohi ninyo ang Maayong Balita!” 16Samtang naglakaw si Jesus sa daplin sa Lanaw sa Galilea, nakita niya ang duha ka mananagat, si Simon ug ang iyang igsoon nga si Andres, nga namukot. 17Unya si Jesus miingon kanila, “Kuyog kamo kanako ug tudloan ko kamo sa pagpanagat ug mga tawo.” 18Dihadiha gibiyaan nila ang ilang mga pukot ug mikuyog kaniya. 19Mipadayon si Jesus sa unahan ug nakita niya ang laing duha ka magsoon, si Santiago ug si Juan, mga anak ni Sebedeo. Didto sila sa ilang sakayan nag-andam sa ilang mga pukot. 20Sa pagkakita ni Jesus kanila, gidapit niya sila sa pagsunod kaniya. Busa gibiyaan nila ang ilang amahan didto sa sakayan uban sa mga sinuholan, ug mikuyog sila kang Jesus. Ang Ebanghelyo sa Ginoo.
oOo
KAHULOGAN SA EBANGHELYO
14a Sa dihang nabilanggo na si Juan,
Si Markos wala mopatin-aw kon unsay hinungdan ngano nga si Juan nga Magbubunyag gibilanggo. Iya pa kining ipasabot sa unahan (Mk 6:17-18). Apan usa ka kamatuoran nga dili ikalalis mao kini: nga kadtong mga tawo nga misulti sa ngalan sa Ginoo, sa pa-ngagpas sa uban, nagtisok og kagubot. Sa dili madugay si Jesus mosunod sa mga lakang ug kasinatian ni Juan nga Magbubunyag. Umaabot ang panahon nga diha sa pagwali ni Jesus mahimutang usab ang mga dautang panghunahuna batok kaniya, ang pagpanggukod batok kaniya, ug unya ang hamtang sa kamatayon. Ang nahiabutan ni Juan mao usab unya ang sanputanan nga mahitabo diha kang Jesus!
Sa mga higayon nga adunay mga isyu nga sukwahi sa gitudlo kang Cristo, may kaisog ba ako sa pagbarog aron sa pagpakigharong niini? Andam ba ako sa pagsaksi sa akong pagka-Kristohanon bisan pa kon nagdala kini og dakong sakripisyo sa akong kaugalingon?
14b miadto si Jesus sa Galilea…
Sa makaduha matagboan nato ang kasayoran nga kini nahitabo sa Galilea. Ang Galilea dili lamang usa ka dapit kon dili nagdala kini og kahulogang teolohikal. Ang bibliya nagtawag niini og “Ang Galilea sa mga kanasuran” (Is 8:23, Makabeo 5:15, Mateo 4:15). Ang Galilea maoy usa ka dapit nga gipuy-an sa mga tawo nga mga langyaw, sa ato pa kadtong mga dili Judeo. Ang mga taga-Galilea dali rang mahibaloan gumikan sa ilang sinultihan nga may kalainan sa mga tawo sa Jerusalem.
Sa iyang pagpili sa Galilea, si Jesus nahimong usa ka misyonero ngadto sa mga tanang mga tawo. Sa Galilea gipaminaw si Jesus; samtang ang Jerusalem mikontra kang Jesus.
Kitang mga Kristyanos, dili ba mas masayon ang pagpakig-uban-uban sa atong mga isigka-Kristyanos. Apan kita gisugo usab sa pag-adto sa mga dapit nga gipuy-an sa mga dili Kristyanos. Mao nga aduna kitay mga misyonero. Misuporta ba ako sa mga buluhaton sa mga misyonero?
Kat-onan ta nga wala kita mahimong kristyanos “alang sa kaugalingon lamang” kondili “alang sa uban”! Ang misyon sa simbahan dili lamang alang sa iyang kaugalingong mga sakop. Ang simbahan usa ka misyonero!
14cug nagsangyaw sa Maayong Balita sa Dios.
Mga pulong nga usahay wala nato hatagi og dakong pagtagad. Matag Domingo, madungog nato nga ang “Maayong Balita” giproklamar.
Sa mga magwawali mao ba gayod kini ang unod sa giwali: nga ang mensahe nagdala og Maayong Balita! Sa mga naminaw, mao ba usab kini ang atong nabati: nga nadunggan gayod nato ang Maayong Balita!
Atong mahinumduman nga sumala sa saysay sa Daang Tugon, ang Maayong Balita maoy giwali ngadto sa mga katawhan nga anaa sa kaulipnan (Is 40:9, 52:7, Salmo 96:2). Sa Bag-ong Tugon, masayran nato nga ang Maayong Balita mao ang kabahin sa Pagkabanhaw nga iproklamar sa Galilea (Markos 14:28, 16:7).
Ang akong pagtuo ako bang gipuy-an uban sa kalipay? Masaksihan ba kining maong kalipay nga akong gibatonan sa ubang mga tawo?
15aMiingon siya, “Miabot na gayod ang panahon nga maghari na ang Dios!
Ang Dios maghari! Mao kini ang pasalig sa daghang gisulat diha sa Daang Tugon (Micah 2:13, Isaias 6:1-3, 43:15, Jeremias 3:17, 8:19, Ezekiel 20:33). Diha sa Salmo anaa ang mga pag-awit kabahin sa Gingharian sa Dios (Salmo 48, 94, 97, 100) nga nagsaad sa kamugnaan niini.
Dinhi makita nato nga si Jesus mipahayag nga mianhi siya sa tuyo nga matuman kining maong mga saad. Ang laraw sa Dios matuman: ang mga kabos, gigutom, nagbakho, gidaogdaog, mga makasasala ug mga masakiton hatagan og kaalim ug kagawasan (Lukas 4:16-30).
Ang katumanan sa “Laraw sa Dios” gisugdan na. Dinhi gipabati na ang kaduol sa Dios diha sa mga katawhan. Bisan pa tuod nga dili pa hingpit ang Gingharian sa Dios dinhi sa kalibutan, apan ania na gayod kini!
15bBusa hinulsoli ug biyai ang inyong mga sala ug tuohi ninyo ang Maayong Balita!”
Kining pagkaduol sa Dios tali kanato nagkahulogan nga kita mangandam sa pagdawat sa iyang presensya uban kanato. Unsaon man? Sa paghimog hingpit nga kausaban sa kinabuhi. Kini nagpasabot nga adunay pagbasol: gikan sa pagkamakasasala ngadto sa pagkatinubos.
Ug maoy hinungdan nga human niini misunod dayon ang pagdapit ni Jesus sa iyang unang mga tinun-an (Markos 1:16-20). Sa panggibuhaton sa pagtukod sa Gingharian sa Dios dinhi sa atong kalibutan, si Jesus nagkinahanglan og mga tawo nga moabag kaniya. Ang unang mga miabag mao ang mga Apostoles.
+++++++
AKONG PANGHINAOT NGA PUNO SA GRASYA ANG TANAN NGA NAHILAMBIGIT SA CATHOLIC FAITH DEFENDERS – CFD SA ILANG BALAANONG KATUYOAN UG MGA APOSTOLADO!