Sinulat ni Elvira Bongosia
Nipasidaan ang Bureau of Customs (BOC) sa publiko batok sa parcel scam o love scam ilabi karong nagkaduol usab ang Valentine’s Day.
Matud pa sa gipagawas nga pahimangno sa BOC, ang parcel o love scam usa ka modus operandi diin motawag o magpadala ug text message o email ang usa ka consignee sa cargo o parcels aron mangayo ug salapi isip clearance fees aron ma-release ang shipments gikan sa BOC-Ninoy Aquino International Airport (NAIA).
Giingong gigamit usab sa nahisgotang modus ang pangalan sa pipila ka opisyal sa BOC-NAIA.
“BOC NAIA has been getting an increasing number of inquiries through Facebook page messenger and assistance hotlines during these times of pandemic regarding packages being “held by Customs” which was supposedly sent to them by their “chatmates” or online friend,” matud pa sa pahayag ni District Collector Carmelita Talusan.
(Daghang mga pangutana ang nadawat sa BOC-NAIA pinaagi sa Facebook, messenger ug sa assistance center, karong panahon sa pandemya nga kuno gikuptan sa Customs nga gipadala sa ilang mga higala sa online.)
Giklaro sa BOC-NAIA nga wala sila’y ginapangayo nga clearance fees o dili sila maningil ug bayad alang sa customs duties ug taxes pinaagi sa telepono ug dili usab sila modawat ug bayad sa mga money remittance centers o personal bank accounts.
Matud pa nga modawat lamang ang BOC-NAIA ug bayad alang sa customs duties ug taxes pinaagi sa mga authorized agent banks o BOC cashiers ug mo-isyu usab sila ug official receipt alang sa maong bayad.
Gi-awhag ang publiko nga makasugat ug susama niini nga modus, motawag lamang sa BOC-NAIA sa ilang assistance hotlines nga 095692452626 ug 09617594067 aron dili mailad sa mga mangingilad.