Sinulat ni Rey Anthony Chiu
Sa sunod buwan, sugdan usab sa kagamhanan ang supplementary vaccination activity, alang sa tulo ka mga gikaintapan nga mga sakit nga mahimong sumpuon pinaagi sa saktong pabpangbakuna.
Kini maoy giluwatan nga pasiuna nga kasayuran ni Lester Ouano, Communications Development Officer sa Relief International, usa ka humanitarian non-profit nga kahugpungan nga nagtanyag ug emergency relief, economic rehabilitation, development assistance, ug serbisyo sa mga programa alang sa mga komunidad nga nameligro sa mga hulga sa katalagman, ekonomikanhong pagpihig, tanyag pangkaugmaran ug mga serbisyo.
Nakigtambayayong sa kagamhanan alang sa laing hugna sa pagpangbakuna batok sa tipdas, rubella ug oral polio, ang Relief International kauban ang Department of Health (DOH) kasamtangan nga nakigsabut sa mga local nga mga kagamhanan alang sa paspas ug epektibo nga pagpatuman sa lukop nga pagpangbakuna sa mga kabataan nga nag edad ug 9 ka buwan ngadto sa 5 ka tuig alang sa tipdas ug rubella ug 5 ka tuig paubos alang sa oral polio vaccine (OPV), saysay ni Ouano didto sa Kapihan sa PIA, sa milabang nga semana.
Samtang ania kita sa pandemya, namatikdan nato ang pagkaylap sa tipdas, rubella (German Measles) o tipdas sa hangin ug migawas ug balik ang polio, nga mahimong tungod kay nabalda ang pagpangbakuna tungod sa mga pagdili sa pandemya, dugang niya.
Ang tipdas, usa ka matang sa sakit nga dala sa kagaw, dali nga manakod ug kon dili mabakunahan ang bata, hayan ma-igo sa komplikasyon sama sa pagkabuta, paghubag sa utok, paghubag sa dunggan ug pneumonia.
Sa laing bahin, ang rubella o German Measles kusog manakod ug kon matakdana ng buntis, delikado kining makuhaan sa gisabak, o magkadeperensya ang bata nga gi-anak niini.
Ang polio, o poliomyelitis, kagaw ang kina-inganan, ug kon kini makasulod sa dugukan sa tawo, moatake sa mga ugat-ugat nga magpalihok sa kamot ug tiil, hinungdan sa pagkaparalisa niini.
Sa mga grabe nga kaso sa polio, ang mga unog nga pangginhawa maoy apektohan hangtud nga dili makaginhawa ang tawo ug mamatay.
Ang kagaw sa polio, mahimong aksidente nga makaon, mainum sa tawo ug kon mahungit ang kamot nga may hugaw sa tawo nga may polio, pasabut sa mga tinugyanan sa kasanihan.
Aron malikay ang mga kabataan sa naghulga nga mga sakit nga mahimong ikapuno sa daan nga puno nga mga ospital sa pandemya, gisugyot ang Measles Rubella Oral Polio Vaccine Supplemental Immunization Activity (MR OPV SIA) aron abton ug kahatagan ug dugang panalipod ang tanang kabataan sa nasud, butyag ni Ouano.
Sa mga hagit sa pandemya, gipadayag usab ni Ouano nga kinahanglan nag sistematiko nga pagpangbakuna aron dili maghan-ok ang mga tawo ug mameligro hinuon sa pagtakod sa sakit.
Gawas sa gitagan nga vaccination posts sa mga LGUs, maayo usa nga may schedule kanus-a pwede moadto, unsay paagi pag-abut sa bakuna ngadto sa mga hilit nga lugar, nga usa lamang ka tig-atiman ang kuyogan sa bata ug nga magsunod permi sa mga minimum health ug safety protocols.
Ang mga kalihukan kabahin sa Programang Healthy Pilipinas, Chikiting Ligtas sa DOH, Relief International, United Nations Childrens Educational Fund ug sa World Health Organization.