Sinulat ni Elvira Bongosia
Gipapas sa Department of Health (DOH) ang kahadlok sa publiko kalabot sa kumpirmadong pagsulod sa United Kingdom (UK) variant sa coronavirus disease 2019 (COVID-19) sa nasud.
Ang UK variant sa coronavirus na-detect sa usa ka Pilipino nga mipauli sa Pilipinas gikan sa United Arab Emirates niadtong Enero 7, 2021, human migawas sa nasod ug niadto sa Dubai niadtong Disyembre 27, 2020 tungod sa negosyo.
Matud pa sa DOH nga dili angay mabalaka ang publiko kalabot sa pag-detect sa unang kaso sa bag-ong variant sa Covid sa nasud tungod kay wala man nausab ang ‘mode of transmission’ niini.
Kalabot niini, gipahinumdoman sa tigpamaba sa DOH nga si Maria Rosario Vergeire ang publiko sa pagsunod gihapon sa mga gipatumang minimum health standards aron makalikay nga matakdan sa maong sakit.
“I’d just like to remind the public, unang-una po tungkol sa variant, there is no need to panic actually kung tayo lang po ay susunod sa minimum public health standards,” pahayag pa ni Vergeire.
(Ako lang ipahinumdom sa publiko kalabot sa variant, nga walay angay kabalak-an kon kita motamod lang sa mga minimum health standards.)
“Di po siya nagbago ng transmission. ‘Yun pa rin po. Wala pong sinasabi na mas magkakaroon ng severe disease pero kung patuloy na kakalat maaaring magkaroon ng mas madaming hospitalization,” pagklaro pa sa tigpamaba sa DOH.
(Walay nausab sa pagtakod. Mao ra man gihapon. Dili tinuod nga mugrabe ang sakit kon matakdan. Hinoon, mudaghan ang ma-ospital kon padayon nga mukuyanap ang maong kagaw.)
Gi-awhag usab sa DOH ang mga local government units nga hingpit nga mahimong alerto ug siguradohon nga hingpit nga nasunod ang mga quarantine ug isolation protocols.
Apil sa minimum health standard ang pagsuot ug face mask, face shield, pagsunod sa physical distancing, pagbutang ug alcohol sa mga kamot, paglikay sa mga lugar nga gidugok ug daghang tawo, ug uban pa.