Ni Padre Jose “joesum” Sumampong, Jr.
Enero 31, 2021
Ika-Upat nga Domingo sa Tuig (B)
EBANGHELYO (Mk 1:21-28)
21Unya miabot sila sa lungsod sa Capernaum, ug sa pagkasunod nga Adlawng Igpapahulay misulod si Jesus sa sinagoga ug nagtudlo. 22Ang mga tawo nga nakabati kaniya natingala sa iyang tinudloan, kay may gahom man siya sa iyang pagtudlo, ug dili sama sa mga magtutudlo sa Balaod.
23Unya may tawo nga giyawaan nga misulod sa sinagoga ug misinggit, 24“Unsay imong tuyo kanamo, Jesus nga Nazaretnon? Mianhi ka ba aron paglaglag kanamo? Nakaila ako nga ikaw mao ang Balaang Sinugo sa Dios!”
25Apan gibadlong ni Jesus ang yawa, “Hilom, ug gula nianang tawhana!”
26Gipakurog sa yawa ang tawo, unya misinggit og kusog ang yawa ug migula. 27Hilabihang kahibulong sa mga tawo
nagpangutan-anay sila, “Unsa ba kini? Bag-ong pagtulon-an? Kining tawhana adunay gahom sa pagsugo sa mga yawa, ug sila motuman ra ba gayod kaniya!”
28Busa ang balita mahitungod kang Jesus daling mikaylap sa tanang dapit sa Galilea. Ang Ebanghelyo sa Ginoo.
oOo
KAHULOGAN SA EBANGHELYO (Mk 1:21-28)
21aUnya miabot sila sa lungsod sa Capernaum…
Ang pulong “sila” nagtug-an kanato nga si Jesus wala na mag-inusara, kondili aduna na siyay mga kauban. Kahinumduman nga si Jesus midapit og upat ka mga tinun-an: sila si Andres, Simon, Santiago ug Juan (Mk 1:14-20). Uban kanilang upat si Jesus misulod sa lungsod sa Capernaum, usa ka dapit nga daplin sa baybayon sa Galilea. Sukad karon si San Markos kanunay nga mosugilon bahin kang “Jesus uban sa iyang mga tinun-an.” Ang buluhaton ni Jesus maoy buluhaton sa pundok nga mao “ang Simbahan.”
Ang Capernaum maoy usa ka dapit nga angay sugdan ang pagsabwag sa Ebanghelyo. Ang among dapit labing nagkinahanglan sa maong mensahe.
Sa atong modernong panahon karon susama kini sa Manila, Hongkong o New York. Adunay pantalan. Usa ka dapit nga managtapok ang mga nagkalainlaing mga tawo: mga biyahidor, magpapatigayon, mga trabahante, mga mamalitay, mga sundalo, mga makalilimos, mga adunahan nga gikan sa silingang dapit, mga lumad nga gikan sa kamingawan, mga kobrador sa buhis, ug uban pa. Dakog purohan nga daghan ang makapaminaw sa pagwali sa Ebanghelyo.
21bug sa pagkasunod nga Adlawng Igpapahulay misulod si Jesus sa sinagoga ug nagtudlo.
Ang sentro sa mga buluhaton anaa kang Jesus. Si San Markos mihulagway nga ang kasagarang gihimo ni Jesus naglambigit og upat ka mga matang sa mga buluhaton: 1) ang pagpanudlo, 2) ang paghingilin sa mga dautang espiritu, 3) ang pag-ayo sa mga masakiton, ug 4) ang pag-ampo. Kining tanan pahitaboon sa matag adlaw (Mk 1:21, 35).
22Ang mga tawo nga nakabati kaniya natingala sa iyang tinudloan, kay may gahom man siya sa iyang pagtudlo, ug dili sama sa mga magtutudlo sa Balaod.
Gigamit ni Jesus ang pulong nga Griego “didake” nga sa ato pa, “pagtudlo”. Mao kini ang labing unang misyon ni Jesus ug mao usab ang labing mahinungdanong misyon sa Simbahan.
Wala kita tug-ani ni San Markos kon unsay gitudlo ni Jesus. Apan ang saysay tataw kaayo nga nag-ingon nga ang mga nakabati niini may “katingala”. Ang maong katingala diha manukad sa “gahom” nga nagauban sa maong pagtudlo.
Si San Juan, sa iyang saysay sa Ebangehlyo, mipahayag sa pag-ingon: “1Sa wala pay nabuhat bisan unsa, ang Pulong diha na. Ang pulong uban sa Dios, ug ang Pulong Dios. 2Sukad pa gayod sa sinugdan ang Pulong uban sa Dios. 3Pinaagi kaniya gibuhat sa Dios ang tanan, ug walay bisan usa sa tanan nga nabuhat nga dili pinaagi kaniya. 4Gikan kaniya ang kinabuhi, ug ang maong kinabuhi mao ang kahayag sa mga tawo. 5Ang kahayag nagdan-ag diha sa kangitngit, ug wala makabuntog niini ang kangitngit” (Juan 1:1-6). Sa laing pagpamulong si San Markos misulti sa hinungdan sa maong gahom.
Gibati ko ba ang maong gahom sa matag higayon nga makapaminaw ako sa pagwali sa Ebanghelyo?
23Unya may tawo nga giyawaan nga misulod sa sinagoga ug misinggit,
Kawhaan (20) ka mga higayon nga gisaysay sa Ebanghelyo ang paghingilin ni Jesus sa mga yawa o dautang espiritu.
Adunay pipila ka mga pasundayag o salida sa sine nga naghulagway niini, sama sa Exorcist ug karong bag-o The Exorcism of Emily Rose.
Nagtug-an kini kanato nga anaa gayod ang yawa o dautang espiritu. Kini sila mao ang nakigbisog batok sa Gingharian sa Dios. Kini sila mao ang nakigbatok sa pagka-balaan.
Ug si Jesus mianhi aron sa paghatag kanato sa kagawasan gikan sa mga yawanhon o dautang gahom.
24“Unsay imong tuyo kanamo, Jesus nga Nazaretnon? Mianhi ka ba aron paglaglag kanamo? Nakaila ako nga ikaw mao ang Balaang Sinugo sa Dios!”
Mismo ang yawa nasayod kon kinsa si Jesus. Nasayod usab ang yawa sa hinungdan sa pag-anhi ni Jesus. Si Satanas mipahayag sa iyang pakiggubat kang Jesus. Ug tinuod gayod nga ang kinabuhi diha kang Cristo mao ang pakiggubat batok sa gahom sa dautan!
25Apan gibadlong ni Jesus ang yawa, “Hilom, ug gula nianang tawhana!”
Ang pulong “gibadlong” mao usab ang gigamit nga pulong ni Jesus sa pagpahunong sa unos didto sa lanaw (Mk 4:39). Dinhi ikahibalag nato ang hingpit nga gahom ni Jesus: Mohilom ang dautan kon atbangan sa gahom sa Dios!
26Gipakurog sa yawa ang tawo, unya misinggit og kusog ang yawa ug migula. 27Hilabihang kahibulong sa mga tawo nagpangutan-anay sila, “Unsa ba kini? Bag-ong pagtulon-an? Kining tawhana adunay gahom sa pagsugo sa mga yawa, ug sila motuman ra ba gayod kaniya!”
Hangtod sa atong panahon karon, ang buhat ni Jesus makit-an sa duha ka mga paagi:
Una, diha sa “mga Pulong”, ang iyang gitudlong mensahe nga magpabiling bag-o sa tanang panahon, ug
Ikaduha, diha sa “mga Timaan”, ang mga aksyon ni Jesus diha sa Sakramento nga nagdalag Gahom sa Dios.
28Busa ang balita mahitungod kang Jesus daling mikaylap sa tanang dapit sa Galilea.
Mikaylap ang balita mahitungod ni Jesus sa matag higayon nga atong saulogon ang iyang Pulong ug ang iyang mga Timaan diha sa Sakramento!
+++++++
AKONG MGA PAG-AMPO ALANG SA MGA NANGULONG-ALAGADUG MGA SAKOPSA COUPLES FOR CHRIST UG SA FAMILY AND LIFE APOSTOLATE.AKONG PANGHINAOT NGA ANG ATONG SAAD O MGA SAAD NING BAG-ONG TUIG 2021MAGPADAYON SA TANANG MGA ADLAW NING TUIGA !