Sinulat ni Rey Anthony Chiu
Walay nakita nga konseksyon ang mga sakop sa Global Advisory Committee on Vaccine Safety (GACVS) sa World Health Organization (WHO) sa gikataho nga pagkamatay sa mga senior citizens nga gitupokan sa bakuna sa Pfizer BioNTech.
Ang GACVS, komitiba nga gibarugan sa 14 ka mga giila nga eksperto sa tibuok kalibutan sa ilang mga tagsatagsa ka nataran sa pagtumbok sa gigikanan sa sakit nga mananakod, stadistika, panambal sa mga bata, internal medicine, siyensya sa mga tambal ug medisina, siyensya sa hilo, sa mga sakit mananakod, public health, immunology u gang siyensya sa panalipud sa lawas, pagtomar sa tambal ug ang mga luwas nga tambal.
Sa ilang labing bag-o nga tigum niadtong Enero 19, 2021, aron repasohon ang makaykay nga kasayuran kabahin sa gikataho nga mga senior citizens nga nangamatay human matupuki sa Pfizer BioNTech COVID-19 mRNA vaccine, BNT162b2.
Dili man tataw kon mao ba nga kaso, apan ang nataho nga mga nangamatay nga Norway, maoy gipasapasa aron ipanghadlok sa mga walay kasayuran, bisan pa nga gipanghimakak ang pagsumpay sa kamatayon ug sa bakuna.
Sa nahisgutan nga tigum, may mga eksperto usab nga gikan sa European Medicines Agency (EMA) ug sa Uppsala Monitoring Center (UMC) aron maoy mopadayag sa overview sa mga kamatayon nga gikataho sa Europe ug sa WHO global database (VigiBase) human sila matud pa nabakunahi sa BNT162b2.
Subay sa makuti nga pagrepaso gamit ang siyentipiko nga paagi sa mga kasayuran nga makuha, ang komitiba mipadayag nga:
Ang kasamtangan nga mga taho wala magpasabut nga modaghan pa ang mamatay ilabi na sa mga edaran na, o dugang pa nga mga dili maayong panghitabo human matupukan sa BNT162b2.
Subay sa mga makuha nga kasayuran sa mga taho, ang makuha nga kasayuran wala makamompirmar nga ang pagpabakuna mao bay kina-ingnan sa gikataho nga pagpangamatay.
Subay
usab niini, matud sa Komitiba, sa ilang pagtimbangtimbang sa kaayohan nga ikahatag sa BNT162b2 ngadto sa mga edaran, sa risgo ug sa kaayohan, mihukom ang komitiba nga ang bakuna nagpabilin nga labing maayo pa gihapon sa mga may edad na, wala nay kinahanglan pa nga usbon sa formulasyon, kay luwas kini nga bakuna.
Nunot usab niini, nanawagan ang GACVS ngadto sa mga kanasuran nga unta ilang ipadayon ang pagmonitor sa epekto sa luwas nga mga bakuna ug sa pagduso ug pagsuporta sa gikinahanglan nga pag-atiman human mabakunahan, subay sa mga maayong bansay sa pagpangbakuna sa bisan unsa man nga bakuna.
Nanawagan usab ang GACVS nga kon ugaliang sa ilang pagpangbakuna sa mga kanasuran, adunay mamatikdan nga dili maayong hitabo sama sa gidudahan nga epekto sa bakuna, sa pagkuha sa mga datos niini aron ma-apil sa mga pagrepaso nga magpanghitabo sa mga rehiyon, nasud, ug sa rehiyonal nga mga eksperto samtang magkadaghan usab ang matang sa bakuna nga ipangtagak sa tibuok kalibutan.
Pasalig usab sa GACVS subcommittee nga kini magpadayon sa pagmonitor sa kaluwasan sa mga bakuna aron ilang mapahibaw ang kalibutan sa labing bag-o nga mga kasayuran kon gikinahanglan.