Ang Tawag

Ni Padre Jose “joesum” Sumampong, Jr.

Pagbunyag sa Ginoo (B)

Pebrero 10, 2021

EBANGHELYO (Mk 19-39)

Gikan sa sinagoga miadto sila sa pinuy-anan ni Simon ug ni Andres, ug kuyog nila si Santiago ug si Juan. ³⁰Niining higayona, ang ugangang babaye ni Simon gihilantan ug naghigda. Sa pag­abot gayod ni Jesus didto, gisuginlan siya mahitungod sa masakiton. ³¹Giduol ni Jesus ang masakiton, gikuptan ang kamot ug gipabangon. Dihadiha gihuwasan sa hilanat ang masakiton ug unya misilbi siya kanila. ³²Sa pagsalop na sa adlaw, gidala sa mga tawo ngadto kang Jesus ang tanang masakiton ug ang mga giyawaan. ³³Ang tanang tawo sa lungsod didto magpundok sa atubangan sa balay. ³⁴Unya giayo ni Jesus ang daghang mga tawo nga nag­antos sa nagkalainlaing mga sakit, ug iyang gipagula ang daghang mga yawa gikan sa mga gi-yawaan. Wala niya tugoti ang mga yawa sa pagsulti kay nakaila man sila kaniya.  ³⁵Kaadlawon pa gani, mibangon na si Jesus ug milakaw. Migawas siya sa lungsod ug miadto sa usa ka dapit nga awaaw ug nag-ampo didto. ³⁶Apan si Simon ug ang iyang mga higala nangita kaniya, ³⁷ ug sa dihang nakit-an nila siya, miingon sila, “Ang tanan nangita kanimo.” ³⁸Apan mitubag si Jesus, “Mangadto kita sa kasikbit nga mga balangay. Kinahanglan walihan ko usab sila, kay mao kini ang tuyo sa akong pag-anhi.” ³⁹Busa misuroy si Jesus sa tibuok Galilea, nagwali sulod sa mga sinagoga, ug gipagula niya ang mga yawa gikan sa mga giyawaan.  Ang Ebanghelyo sa Ginoo.

oOo

KAHULOGAN SA EBANGHELY0 (Mk 1 29-39)

²⁹Gikan sa sinagoga miadto sila sa pinuy-anan ni Simon ug ni Andres, ug kuyog nila si Santiago ug si Juan.

   Human sa iyang pagpanudlo nga nakapakugang sa mga tawo, human niya luwasa ang tawo gikan sa dautang espiritu, si Jesus mibiya sa sinagoga, usa ka dapit nga publiko, ug karon misulod sa usa ka dapit nga pribado, ang panimalay nila ni Simon ug Andres.

   Bisan sa atong panahon karon, ang Dios nagapadayon sa pagpadayag sa iyang kaugalingon sa bisan asang dapita, mapubliko o mapribado.

^30aNiining higayona, ang ugangang babaye ni Simon gihilantan ug naghigda.

Hilabihan kadaghan sa mga tawo nga giayo ni Jesus.  Sa karaang panahon, ang sakit adunay kadugtongan sa relihiyon ug ang mga mananambal mao ang mga pari.  Samtang sa atong panahon karon ang sakit giisip nga iya na sa siyensya sa pagpanambal.  Apan dili usab ikalimod nga bisan kon nadugangan na ang atong panabot sa modernong panambal, apan ang sakit nagpabilin nga nakapabalaka kanatong mga tawo.  Walay tawo nga dili mahadlok nga takboyan sa sakit.  Ang matag usa kanato nasayod nga aduna gayoy mga sakit nga moabot nga wala gayoy kaayohan ug kini unya ang hinungdan sa atong dili kalikayan nga kamatayon.

 ^30b Sa pag­abot gayod ni Jesus didto, gisuginlan siya mahitungod sa masakiton. ^31aGiduol ni Jesus ang masakiton, gikuptan ang kamot ug gipabangon.

   Si Jesus namati sa gisugilon ngadto kaniya, unya miduol siya sa masakiton, gikuptan ang kamot ug gipabangon.  Mga buluhaton sa tawo nga nagpakita sa kaayo o kamahigalaon.  Mao diay nga ang teolohiya mahitungod sa sakramento naghulagway niini nga mga “buhat ni Cristo” nga nagdala og kaayohan alang kanatong mga tawo.

   Gipabangon! Ang pulong nga gigamit ni Markos mao ang “egeire” nga nagkahulogan og pagkabanhaw. Kining pulonga mao usab ang gigamit sa dihang si Jesus miayo sa anak ni Jairus (Mk 5:41). Ang iya mismong pagkabanhaw gilarawan sa maong pulong (Mk 12:26; 16:6). Alang kang Markos ang pag-ayo sa mga masakiton mao ang labing lig-on nga kasayoran mahitungod sa pagtulun-an sa kamatuoran mahitungod sa pagkabanhaw.

 ^31bDihadiha gihuwasan sa hilanat ang masakiton ug unya misilbi siya kanila.

   Ang tinuod nga kaayohan mao ang paglawig gikan sa “pagka-walay pagtuo” ngadto sa “pagbaton og pagtuo”. Ang kaayohan nga ikahatag ni Kristo mas labaw pa kay sa kaayohan sa lawas. Iya usab nga ayohon ang espiritu o kalag sa tawo. Gipabangon kadtong mga walay pagtuo aron makaalagad. Ang labing dautan nga mahitabo sa tawo mao ang “walay pag-alagad” sa uban. Matuod gayod nga ang kahulogan sa kinabuhi sa tawo maanaa lamang kon ang tawo moalagad sa laing tawo.

³²Sa pagsalop na sa adlaw, gidala sa mga tawo ngadto kang Jesus ang tanang masakiton ug ang mga giyawaan. ³³Ang tanang tawo sa lungsod didto magpundok sa atubangan sa balay. ^34aUnya giayo ni Jesus ang daghang mga tawo nga nag­antos sa nagkalainlaing mga sakit, ug iyang gipagula ang daghang mga yawa gikan sa mga giyawaan.

   Sa pag-ayo pa ni Jesus sa mga tawo nga may sakit, iya usab nga gipadayag ang iyang pagkagamhanan batok sa gahum sa dautan.  Alang kang Jesus ang dautan mao ang larawan usab sa sala. Ang sala mao ang labing dautan tungod kay kini makapahimulag man sa tawo sa katalian sa Dios.

   Sa atong panahon karon anaa ang dakong panginahanglanon sa pag-ayo dili lamang sa lawasnon sakit sa tawo, kondili sa pag-ayo sa kasingkasing sa tawo!

^34bWala niya tugoti ang mga yawa sa pagsulti kay nakaila man sila kaniya.

   Niining higayona, buot ni Jesus nga magpabilin pa nga sekreto ang iyang pagkamangluluwas (messianic secret). Gipa-ningkamutan pa niya nga dili unta masaypan sa mga tawo ang kahulogan sa iyang pagpangayo sa mga masakiton. Dili siya buot nga ang mga tawo makabaton og sayop nga panghunahuna kabahin sa iyang pagka-Mangluluwas.  Kay ang sakto nga panahon nga ang tawo makasabot ra unya sa iyang pagka-Mangluluwas mao ang panahon tapos sa iyang pagpasakit ug pagkamatay sa Krus ug ang iyang mahimayaong pagkabanhaw.

³⁵Kaadlawon pa gani, mibangon na si Jesus ug milakaw. Migawas siya sa lungsod ug miadto sa usa ka dapit nga awaaw ug nag-ampo didto.

   Dinhi maamgohan nato nga ang labing mahinungdanong tahas ni Jesus nga mao ang pakig-uban ug pakigsuod sa iyang Amahan.  Ang kahulogan ug katumanan sa iyang misyon sa pagpangluwas anaa magasandig sa iyang “pag-ampo” ngadto sa Amahan.

³⁶Apan si Simon ug ang iyang mga higala nangita kaniya, ³⁷ ug sa dihang nakit-an nila siya, miingon… sila, “Ang tanan nangita kanimo.” ³⁸…mitubag si Jesus, “Mangadto kita sa kasikbit nga mga balangay…³⁹Busa misuroy si Jesus sa tibuok Galilea…

   Si Jesus buot gayod nga moabot sa ubang mga dapit ug moayo sa tanan! Ania ang pagka-misyonero sa Simbahan!

AKONG PASIUNANG PAGTIMBAYA KANINYONG TANAN SA

“ADVANCED HEARTFUL VALENTINE DAY” KANATONG TANAN!

PADAYONON TA ANG HINIUSANG PAG-AMPO  NGA MAWAGTANG NA ANG PANDEMIYA SA COVID 19.