Sinulat ni Rey Anthony Chiu
Mahimo na nga ang mga local nga operators sa mga suroyanan sa mga turista nga mokuha ug Certificate of Authority to Operate (CAO) gikan sa ilang local government unit (LGU).
Kini maoy usa sa mga nausab nga seksyon sa Executive Order No. 53 series of 2020 nga opisyal nga gisakop sa bag-ong executive Order No. 7 series of 2021.
Niadtong Enero 27, 2021, ug subay usab sa panginahanglan nga padak-an pa sa Bohol ang pagbukas sa mga negosyo ug ang industriya sa turismo aron molihok pagbalik ang ekonomiya, gipagawas ni Gobernador Arthur Yap ang Executive Order No. 7, nga nag-amedar usab sa Bohol tourism bubble.
Ang Bohol tourism bubble usa ka paagi nga nagtugot sa mga turista nga makasulod sa Bohol alang sa mga Meetings, Incentives Conventions ug Exhibitions lakip ang pagtambong sa mga events sala sa kasal, birthday, bunyag, reunions ug uban pang mga tapok, basta nasayud niini ang Bohol Tourism Office (BTO).
Dili na kinahanglan pa nga sila nga mga taga dili dinhi sa Bohol mopailawom sa kwarantina kon dili makaabut sa lima ka adlaw ang ilang pag istar sa Bohol.
Hinuon, kinahanglan sila nga magpakita sa negatibo nga resulta pinaagi sa Reverse Transcription, Polymerase Chain Reaction (RT-PCR), ug dili mobyahe gawas sa ilang tourist bubble.
Alang sa mga lugar bisitahanan sa mga turista ug local nga manuroyay nga wala pa makakuha sa ilang Certificates of Authority to Operate (CAO) gikan sa Department of Tourism (DOT), ug wala pa makakuha sa Ultimate Bohol Experience (UBE) Seal gikan sa kagamhanang probinsyal, igo nga makakuha sila sa CAO gikan sa ilang mga LGUs.
Hinuon, sa dili pa kini nila makuha ang CAO, nagkinahanglan pa kini nga subayon sa Bohol Tourism Office, aron matimbang kon may igo ba nga pasilidad, mga pamaagi ug sistema nga makatampo sa pagseguro nga luwas ang mga turista ilabi na sa hulga sa pagtakod sa kagaw sa Corona virus disease (Covid).
Sa higayon nga makakuha ug CAO ang mga lugar suroyanan, obligado sila nga mopasulod sa mga turista nga may bitbit nga tour vouchers nga makuha gikan sa mga DOT-accredited tour operators.
Ang tour vouchers maoy dokumento nga magapatin-aw nga ang turista, walay Covid, nagpanaw kauban sa usa ka pundok nga sakay sa sakyanan nga gisabut sa iyang tour operator ug nakabayad sa iyang mga obligasyon isip turista.
Ang tour voucher kinahanglan nga mahuptan sa turista sa dili pa ang adlaw sa iyang byahe aron makasulod sa mga tourist stops.
Kon walay tour voucher nga ikapakita, pangayoan kini sa Bohol Card o ang Quick Reaction Code nga gihuptan sa mga Bol-anon, kinsa usab may katungod nga mosuroy sa kaugalingon nga lugar.