Sinulat ni Elvira Bongosia
Gisangonan sa Department of Justice (DOJ) ang National Bureau of Investigation (NBI) sa pagpahigayon ug pagpanukiduki kon aduna bay makita nga kaso, kon basehan ang gipasangil nga manipulasyon sa presyo sa karne nga baboy ug ubang batakang panginahanglan.
Kining lakang nakit-an sa kadaghanan nga labing maayong aksyon ilabi kay ang namahal nga presyo sa mga paliton, daku ug gikatampo sa palas-anon sa mga katawhang apektado sa krisis nga dala niining ekonomikanhong pagkahagsak tungod sa pandemya nga dala sa Coronavirus disease (Covid).
Samtang gihimong sayon nga rason ang naglukop nga African Swine Fever sa Luzon ang rason sa nagnihit nga supply sa karne nga baboy, dinhi sa Bohol, ming-abut sa P 90 ang kilo sa pagpalit sa baboy nga buhi, butang nga nakaingon sa grabeng pagka-alkanse sa gagmay nga mamuhiay’g baboy.
Karon, sumala sa taho gihan sa Office of the Provincial Veterinarian, naa na sa tag P250-300 ang kilo sa baboy, tungod usab sa pasangil sa epekto sa ASF ug sa pagnihit sa nangbuhi ug hayupan tungod usab sa pandemya sa Covid.
Pinaagi sa Department Order No. 029 pinitsahan ug Febrero 8, 2021, opisyal nga giluwatan ni Justice Secretary Menardo Guevara ang otoridad sa paghimo ug ga imbestigasyon ug case build-up sa gipasangil nga pagmanipula sa supply ug presyo sa karne nga baboy ug mga pagkaon, nagdto sa NBI.
Matud sa DOJ, alang sa interes sa pagpangalagad ug subay sa mga probisyones sa Republic Act No. 10567 o ang National Bureau of Investigation Reorganization and Modernization Act, kini nagsangon sa DOJ sa pagmandu sa NBI sa pagkaykay kon may kaso ba nga ikapasaka, sa interes sa kadaghanan.
Tungod niini, ang NBI pinaagi ni Officer In-Charge Eric B Distor gimanduan sa pagimbestigar ug gihatagan ug responsibilidad sa paghimo ug mga imbestigasyon kabahin sa giingon nga mga pagsupak sa Republic Act No. 7581 o ang mas nilhan nga Price Act ug sa Republic Act 3815 o ang amended Revised Penal Code ilabi na gud sa Article 186 kabahin sa mga monopoly ug mga nagkadaiyang kalaki sa Restraint of Trade.
Ang paghimo ug mga monopoliya sa pipila ka tawo o ga grupo sa supply ug presyo sa karne nga baboy ug uban nga batakang pagkaon, nahi-apil na sa gitawag ug Restraint of Trade.
Dugang mandu sa DOJ, kon may ebidensya nga kini nagpanghitabo, kinahanglang makapasaka sa tukmang kaso batok sa mga responsabli niini.
Gawas pa niana, gimanduan usab sa DOJ ang NBI pinaagi ni OIC Distor nga magduso kanunay ang ahensya sa mga taho ug progress reports sa gipasugdan nga imbestigasyon ug case build-up direkta ngadto sa buhatan sa DOJ secretary sulod sa 30 ka adlaw gikan sa pagpagawas niining nahisgutang direktiba.