ni Padre Jose “joesum” Sumampong, Jr.
Pebrero 21, 2021
UNANG DOMINGO SA KWARESMA (B)
EBANGHELYO (Markos 1:12-15)
Dihadiha gipaadto si Jesus sa Espiritu Santo ngadto sa kamingawan. 13Nagpabilin siya didto ug kap-atan ka adlaw, ug gitintal siya ni Satanas. Didto may mga ihalas nga mananap, apan may mga anghel nga miatiman kaniya.
14Sa dihang nabilanggo na si Juan, miadto si Jesus sa Galilea ug nagsangyaw sa Maayong Balita sa Dios. 15Miingon siya, “Miabot na gayod ang panahon nga maghari na ang Dios! Busa hinulsoli ug biyai ang inyong mga sala ug tuohi ninyo ang Maayong Balita!” ANG EBANGHELYO SA GINOO
KAHULOGAN SA EBANGHELYO (Markos 1:12-15)
12a Dihadiha gipaadto si Jesus…
Kining maong panghitabo maoy sumpay sa saysay sa Pagbunyag ni Jesus. Sa Ebanghelyo ang tentasyon kon pagsulay kang Jesus dili usa ka yano nga panghitabo. Usa kini ka pagsulay nga nagalangkob sa sukaranan sa Pagtuo (foundation of Faith).
Ang pagsulay may dakong kalabutan sa atong pagkabinunyagan.
Gani, adunay mga panahon nga kitang mga tawo motintal o mosulay sa Dios. Daw moingon kita: “Hain ba ang Dios nga atong gituohan?” Gani diha sa Bibliya adunay pipila ka bahin nga nag-larawan niini sama sa pagpangita og milagro o timaan gikan sa Dios (Mk 8:11). Mabasa usab kini nato diha sa mga Salmo (Salmo 95:9; 78:40-41).
12b … sa Espiritu Santo ngadto sa kamingawan.
Diha sa Bibliya, ang Espiritu sa Ginoo gihulagway nga kusog o gahum nga maoy mipatultol kang Jesus ngadto sa kamingawan. Ang pagsulay didto sa kamingawan usa gayod diay ka dili-kalikayan nga kasinatian ni Jesus kay mismo ang Espiritu Santo mao man ang makusganong mihatod kaniya sa kami-ngawan diin ang maong testasyon mahitabo.
Ginoo, dili unta namo ikalisang ang mga pagsulay. Kinahanglan diay kini sa matag usa kanamo. Hatagi lamang gayod kami og igong kusog sa pagpakigbisog ug paglupig sa mga pagsulay.
13a Nagpabilin siya didto og kap-atan ka adlaw…
Kap-atan ka adlaw! Pagkataas! Pagkadugay!
Nagapahinumdum kanato sa kasaysayan sa mga panghitabo sa Exodus. Ang kasinatian sa mga Israelitas didto sa kamingawan nga miabot og kap-atan (40) ka mga tuig. Si Moises sulod sa kap-atan ka adlaw nagpabilin didto sa bukid (Ex 43:28). Si Elias naglawig sulod sa kap-atan ka adlaw (1 Hari 19:8).
Himoa Ginoo nga mabalaan namo ang kap-atan ka mga adlaw sa kwaresma.
13b… ug gitintal siya ni Satanas.
Sukwahi sa saysay sumala nila ni Mateo ug Lukas diin ang tentasyon nahitabo human sa kap-atan ka adlaw, si Markos mitaho nga ang maong tentasyon nahitabo sulod sa kap-atan ka adlaw.
Atong kahinumduman nga nag-inusara si Jesus sa kamingawan. Busa walay laing tawo nga nakasaksi sa maong tentasyon. Kining maong panghitabo gitug-an ni Jesus ngadto sa mga Apostoles. Matud pa sa mga batid, si Jesus mipaambit niini sa panahon diin si Pedro mihimo sa propesyon sa pagtuo didto sa Cesaria ug si Jesus mipasabot sa iyang umaabot nga kasakit ug kamatayon, unya mitintal si Pedro kaniya nga dili unta kini pahitabuon (Mk 8:27-33). Matud pa human niini, si Jesus mipaambit usab ngadto kanila kon giunsa siya pagtintal sa yawa — nga ihikling kaniya ang tinuod nga misyon nga gitahas kaniya sa Amahan ug pulihan kini sa gahum nga iya sa kalibutan.
Ginoo, makusganon pa kining maong tentasyon sa Simbahan sa among panahon karon. Luwasa kami.
13cDidto may mga ihalas nga mananap, apan may mga anghel nga miatiman kaniya.
Kining bahina sa saysay puno sa mga simbolo nga anaa sa Bibliya: ang panagbangi sa ihalas nga mananap batok sa mga angel. Samtang si Adan miuyon sa tentasyon (Gen 2:19); si Jesus makusganong nakigbatok niini.
14Sa dihang nabilanggo na si Juan, miadto si Jesus sa Galilea ug nagsangyaw sa Maayong Balita sa Dios. 15aMiingon siya, “Miabot na gayod ang panahon nga maghari na ang Dios…
Ang bag-ong binuhat o new creation nagsugod na! Usa ka bag-ong kasaysayan sa katawhan gibuksan na! Tungod kay nagmadaugon man si Jesus batok sa pagsulay nga gihimo ni Satanas, ang Maayong Balita ikasangyaw na!
Ang Maayong Balita nagatug-an mahitungod sa Gingharian sa Dios. Ang Maayong Balita nagapadayag sa Gugma sa Dios!
15bBusa hinulsoli ug biyai ang inyong mga sala ug tuohi ninyo ang Maayong Balita!”
Maayong Balita! Matuod ania na!
Apan wala pa matapos ang pakig-asdang sa gahum sa dautan nga buot mosakmit kanato gikan sa Gugma sa Dios. Si Satanas nagpadayon pa sa iyang pagtintal sa matag usa kanato pinaagi sa pagtanyag kanato sa dili hustong pagsabot kon kinsa ang Dios.
Si Jesus mipasabot nga dili gayod kita magpalingla sa yawa. Lig-onon hinoon nato ang pagtuo sa tinuod nga Dios.
AKONG PANGALIYA NGA PUY-AN NATO ANG MATUOD NGA ESPIRITO NIINING PANAHON SA KWARESMA 2021!