Sinulat ni Dave Albarado
Usa ka akusado nga pinangita sa balaod ang nasikop sa mga tinugyanan sa kapulisan sa Baclayon didto sa lungsod sa Trinidad.
Ang pagpanakop sa akusado nahitabo niadtong adlaw nga Miyerkules, Pebrero 17, 2021, didto sa barangay Cabigohan, lungsod sa Trinidad, matud pa sa taho sa kapulisan gikan sa Kampo Dagohoy.
Dugang pa sa taho nga ang mga tinugyanan sa kapulisan sa Baclayon police station ang midakop sa suspetsado nga giila nga si Paul Narido, 59, nga taga barangay San Roque, Baclayon, ug kasamtangang nagpuyo sa naasoy nga barangay sa Trinidad.
Giduso sa mga tinugyanan sa Baclayon police station ang arrest warrant nga gipirmahan ni Maghuhukom Samuel Biliran nga pinetsahan ug Enero 21, 2021, tungod sa kaso nga attempted murder.
Dugang sa taho, ang korte mitakda sa kantidad nga P120,000 nga maoy pyansa sa maong kaso alang sa temporaryong kagawasan sa nahisgotang akusado sa maong kaso.
Gidala sa Baclayon police station ang maong akusado human sa pagkasikop didto sa Trinidad.