Sinulat ni Dave Albarado gikan sa taho sa Philippine Information Agency
Kinahanglan ang kagamhanan magmugna ug polisiya diin balansehon ang pakigbisog sa Coronavirus disease (Covid) ug pagpabalik sa kalagsik sa ekonomiya, matud pa sa acting nga hepe sa National Economic Development Authority (NEDA).
Gipahayag sa hepe sa NEDA nga si Karl Chua niadtong adlaw nga Lunes, Pebrero 15, 2021, nga iyang gisugyot nga ibutang ang nasud sa mas luag nga modified general community quarantine (MGCQ) aron mulagsik ug balik ang ekonomiya sa Pilipinas.
Matud niya nga kinahanglan nga luagan ang mga restrictions sa labing dali nga panahon, unta sugod karong Marso 1 nga umaabot, aron mahatagan ug pagtagad ang suliran sa kagutom nga nasinati sa pipila ka mga Pilipino.
Dugang pa niya, tungod sa mga restrictions nga gipahamtang sa kagamhanan tungod sa Covid niabot na sa P1.04 trillion ang nawala sa ekonomiya sa nasud.
Matud ni Chua, tungod sa mga restrictions daghang mga Pilipino ang nawad-an ug trabaho.
Base sa usa ka Pulse Asia survey nga gipagawas niadtong Nob. 2020, 73 porsyento sa mga gipangutana sa maong survey nagtuo nga angayan nga ang kagamhanan nga balansehon ang pakigbatok sa Covid ug ang ekonomiya.
Dugang ni Chua nga wala magpasabot nga ablihan na ug balik ang ekonomiya ug dili na tagdon ang suliran sa Covid. Dugang pa niya, kinahanglan adunay balanse nga pagtagad.
Nunot niini, mihatag ug mga sugyot ang NEDA ngadto sa national Inter Agency Task Force (IATF) sa pamasin nga mahatagan ug pagtagad ang maong mga sugyot.
Apil sa sugyot ang pagpaubos sa tibuok Pilipinas sa MGCQ. Daan na nga anaa sa MGCQ ang lalawigan sa Bohol.
Dugang nga sugyot ni Chua nga mugamit ug granular o localized lockdowns alang sa mga barangay o mga lungsod nga adunay dakong suliran sa Covid.
Misugyot usab si Chua nga kinahanglan nga ablihan sa kagamhanan ang mas daghang mga rota sa transportasyon aron mahatagan ug higayon ang mga mamumuo nga makasakay paingon sa trabahuan ug isaka ang pagtugot nga capacity sa mga pampublikong sakyanan gikan sa 50 porsyento ngadto sa 75 porsyento.