Sinulat ni Dave Albarado
Ang Hugpong sa Mag-uumang Bol-anon-Kilusang Magbubukid ng Pilipinas (Humabol-KMP) mikondenar sa pagpatay kang Lucresia Tasic, kagawad sa barangay Hanopol Norte sa Balilihan niadtong Martes sa buntag didto sa iyang pinuy-anan.
Si Tasic, 54, gipusil patay sa wala pa mailhing nga suspetsado kinsa matud pa nagpatuo nga mga kawani sa kagamhanan sa probinsiya nga giingong magpahigayon ug “operation tuli”, sumala sa nadungog sa anak ni Tasic.
Matod sa pamahayag sa Humabol-KMP, si Tasic, nga nag-unang konsehal sa ilang barangay, giingong usa ka tigkampanya alang sa Anakpawis party list sa iyang lokalidad.
Dugang pa sa Humabol sa ilang pamahayag, nga ang pagpang ‘harass’ migrabe dihang ang anak babaye ni Tasic naminyo sa anak ni Domingo Compoc kinsa matod pa gialegar sa militar nga kumander sa New People’s Army (NPA).
Nunot niini, ang igsuon ni Domingo nga si Pelagio Compoc, usa ka mag-uuma ug barangay tanod, ang gipusil usab sa wala mailhing mga tawo niadtong Enero 22, 2020.
Gipahayag usab sa Humabol nga ang pamaagi sa mga mamumuno ni Tasic sa pagpaila sa ilang kaugalingon nga taga gobyerno susama usab sa gihimo sa wala mailhing mga tawo sa milabayng mga buwan nga matod pa mipugos sa mga progresibong lider sa pagsurender.
Giingong wala mailhing mga tawo nagpatuo nga mga empleyado sa kagamhanang probinsiyal o gikan sa Office of the Presidential Adviser on the Peace Process (OPAPP) kinsa matod pa gustong mohan-ay ug tigum tali sa mga biktima ug sa lider sa militar.