Sinulat ni Ven rebo Arigo
Ang “farmer’s market” sa tumoy sa CPG Park dili usa ka wet market nga sama sa Cogon o Dao sumala sa sayop nga pagtoo, matud ni Architect Niño Guidaben.
Susama kini siya ug gamay nga agri-fishery terminal apan sama gayud sa display center–showcase sa mga produkto sa uma ug dagat nga mapalit sa katawhang Bol-anon.
Naandan siya nga gitawag ug farmer’s market kay natural nga ibaligya man ang display nga abot sa uma ug dagat.
Kay anaa sa tumoy sa park ang display center, makapalit kag kan-onon o pagkaon nga madala sa balay samtang magsuroy-suroy sa parke.
Adunay konektado nga inatopan nga pathwalk dili sama sa naunang display area sa atbang sa Bohol Wisdom School nga magkahumod-humod ka kung mag-display ug mamalit kun mouwan.
Kun makalabang na ta sa pandemya, magamit kini nga display center sa mga souvenir items, artworks, handicrafts ug uban pa, ilabinag dunay festival sa probinsiya o dakbayan.
Adunay comfort rooms ug ang display structure dili puro konkreto nga pangpermanente sa iyang lugar.
Hinimo sa puthaw ug ‘gi-bolt’ ang mga structura niini tungod kay kun adunay kausaban sa masterplan sa park sa mosunod nga panahon, dali ra ang pag-irog niini. .
Sama usab kini sa food pavilion nga adunay mga utanon, itlog, bugas, lagutmon, karne ug isda apan pinutos ug selyado nang daan nga gisulod ug paper box o kaha ubang sudlanan o packaging.
Dili sama sa naandang merkado diin sa sementong ladlaranan gikatag ang mga isda ug karne ug bisag asa moagas o iyabo ang duga ug hinugas.
Balanse ang sistema kay dunay mga adlaw nga mopulig display sa ilang abot ang ubang tigproduktog pagkaon. Magbahinay ug kahigayonan aron mabuhi ang tanan, dugang sa taho sa Primer.
Makalakaw-lakaw ka sa park, makabitbit ka pag konsumo sa pamilya inig-uli. Naa poy lugar sa ginagmayng kan-anan para sa mga gigutom.
“Atong garbo si Pres. Garcia. Ang iyang monyumento tua ra sa ubos nga atubangan sa New Capitol. Maayo kaayo siyang pagka-highlight didto. Layo ra kaayo sa display area,” matud sa arkitekto nga consultant sa probinsiya.
Sa wa pa hinlo-i ang lugar aron butangag display facility, wa gayud ni-appreciate niini kay layo ug nabuwag sa central area sa park, sagbot, ngi-ob ug hadlok sudlon kay basig dunay halas.
“We are giving it another life, another chance to be appreciated. I don’t think there is something nga murag maka-desecrate to CPG [Carlos P. Garcia]. It is, in fact, going to be an added amenity to the park,” matud pa ni Guidaben.
Dasun sa arkitekto, “It’s not really building another structure in contrast to the sculpture of CPG. There is nothing wrong with this because ang design is like a covered canopy so that it doesn’t even entail any destructive look to the park.”
Kun mawa na ang pandemya, posibleng ang mga mag-uuma tugutang maka-display gihapon apan sa matag Sabado ug Domingo na.
“Depende pod ni kon dunay mga exhibits or programs highlighting our arts, culture, food and cuisine,” matud ni Guidaben.
Positibo siya nga dili mausik ang proyekto kay magamit sa daghang kapuslanan human sa pandemya.