Sinulat ni Dave Albarado
Ang University of Bohol (UB) niadtong Lunes mihatag ug pagyukbo ngadto ni Estrella Bersamen-Catalan, usa ka nurse nga Bol-anon sa United Kingdom (UK) kinsa namatay tungod sa Coronavirus disease (Covid) sayo ning buwan sa Pebrero.
Ang UB mipadayag sa ilang matinud-anong pahasubo ngadto sa pamilya sa mitaliwan nga Bol-anong nurse.
Sa usa ka pamahayag, si Dr. Victoriano B. Tirol, III, ang presidente sa UB miingon nga ang tulunghaan nakighi-usa sa kinatibuk-ang katilingbang Bol-anon sa pagbangotan sa pagkamatay sa Bol-anong nurse nga si Estrella Catalan kinsa namatay sa Covid sa edad nga 52 anyos.
Si Catalan nahuman sa iyang kursong Bachelor of Science in Nursing niadtong 1989 sa UB, ang unang unibirsidad sa lalawigan sa Bohol.
Dugang pa ni Tirol sa iyang pamahayag nga migawas sa Facebook account sa maong tunghaan, nga ang UB family mapasigarbohon kaniya isip usa ka ‘extra miler, dedicated medical front-liner, ug professional health worker’.
Si Catalan nagtrabaho didto sa Norfolk and Norwich University Hospital (NNUH) sa UK isip usa ka emergency department staff nurse sulod sa 18 ka tuig.
Siya namatay tungod sa iyang serbisyo nga pagtabang sa uban nga mabatokan ang sakit nga Covid.
Si Catalan natawo ug nagdako sa barangay Tugas sa lungsod sa Candijay, Bohol. Siya naminyo ug usa ka engineer nga taga La Carlota City, Negros Occidental.