Sinulat ni Elvira Bongosia
Gikumpirmar ni National Task Force against COVID-19 chief implementer ug vaccine czar Carlito Galvez Jr. nga gisertipikahang urgent na ni Presidente Duterte ang duha ka balaodnon nga tuyong magmugna ug indemnity fund, apil usab ang pagpadali sa pagpalit ug mga bakuna batok sa Coronavirus disease (Covid).
Sa usa ka pahayag, miingon si Kalihim Galvez nga ang mga nahisgotang balaodnon mao ang Senate Bill No. 2057 ug House Bill No. 8648.
Tuyo sa Senate Bill 2057 nga mapadali ang pagpalit ug ang rollout sa Covid vaccines ug ang P500-milyon nga indemnification fund.
Samtang ang House Bill 8648 nagtinguhang mahatagan ug pagtugot ang mga local government units (LGUs) nga mohatag ug advance payments alang sa Covid vaccines.
Pinaagi sa pagsertipika isip ‘urgent’, mahimong ipalabang sa Kongreso ang maong mga balaodnon sa second ug third reading sa parehong adlaw.
Mga ‘Sano mahimong makadaug sa ‘Balik sa Bohol’ raffle prizes
Sinulat ni Rey Anthony Chiu
Bisan ug Bol-anon nga mga paisano (sano), basta mopalit sa hotel accommodations ug tours sa mga establisemento nga miapil sa Balik sa Bohol Online sale gikan sa Pebrero 21 ngadto sa Marso 14, gawas nga mahimong makakuha sa mas barato nga tanyag, mahimo pang makasuroy, bakasyon nga libre.
Kini kay gilusad sa Bohol ang Balik sa Bohol Online Sale, usa ka pamaligya sa mga pagsuroy ug lulinghayaw sa Bohol nga mitanyag sa halos 70 porsyento sa kaltas sa regular nga presyo sa mga katulganan, suroyanan ug mga serbisyo pag-alagad sa turista.
Pamaligya nga giapilan sa 13 ka mga hotels ug accommodation establishments, usa ka adventure park ug 6 ka mga travel ug tour operators nga mga taga Bohol ug gisuportahan sa Department of Tourism (DOT), Tourism Promotions Board (TPB), DOT 7, Cebu Pacific ug mga local nga ahensya sa kagamhanan, ang Balik sa Bohol Online Sale gitumong aron mas padaghanon pa ang mga turista nga mobalik aron usab ang paghandum sa kasinati-an sa pagsuroy sa Bohol.
Matud pa ni Bohol Tourism Officer (BTO) Josephine Cabarrus, 80 % sa mga turista sa Bohol, ang mamalik nga mga manuroyan kay tataw nga wala gyud matagbaw sa ilang una nga kasinati-an dinhi.
Subay niini, gibutyag sa BTO nga tumong nila karon nga aghaton ang mga buot mamalik dinhi apan nangita usab sa kasegurohan nga dili sila matakdan sa sakit.
Ang Balik sa Bohol Online sale giapilan sa Amarela, Amorita, Be Grand Hotel, Bellevue, Ivy Wall Best Western Plus, Bluewater Pangalo, Bee Farm, Bohol Beach Club. Chocolate Hills Adventure park, Acacia Glamping, Donatela, Lobo Rover Resort, South Palms, Mithi, ug Modala.
Sa mga tour operators, lakip niini ang Angels Wings, Baclayon Travels and Tours, Coordinates Travel, Dagohoy Travel and Tours, Travel Village ug Bohol Holidays Travel and Tours.
Gawas sa gipasangil nga mahal ang Bohol nga suroyan ug misamot ka mahal tungod sa estrikto nga pagpatuman sa mga lakang batok sa Coronavirus disease, ang Balik sa Bohol Online Sale buot nga mopamatuod nga barato, luwas ug gipasalig nga mas nindot pa nga suroyan ang Bohol karon nga limitado ang dawaton sa mga resorts ug hotels.
Gibaligya alang sa tanan, bisan ngadto sa mga taga Bohol nga buot makasuway sa mga kasinati-an sa pagkaturista dinhi, ang Balik sa Bohol Online Sale makit-an sa www.traveloco/ph/balikbohol ug kinahanglan nga didto makompleto ang pagbayad sa suroyan pinaagi sa online facility.
Gani, sumala pa sa mga tigpasiugda sa nahisgutan nga tour ug travel promotions, mahimo pa nga ang mga swertehon nga mga Bol-anon makadaug ug 3 ka adlaw ug duha ka gabii nga pagpuyo nga libre sa usa ka hotel o resort, libre nga balikan sa ticket sa eroplano ug uban pang makadani nga mga pahalipay.
Alang sa mga taga Bohol, gikinahanglan lamang nga mopalit sa serbisyo nga gitanyag, may ikapakita nga voucher sa napalit nga puy-nan ug mamahimo nga makadaug.
Ang Balik sa Bohol Online Sale usa ka lakang sa pag-aghat sa mga Pilipino nga gilaayan sa pagkatanggong sa ilang mga panimalay, nga gasahan ang ilang kaugalingon sa pagsuroy sa Bohol diin ang mga mosubay sa mga nindot nga talan-awon pinaagi sa tourism bubble gipaneguro nga dili masagolan ug lain alang usab sa mas luwas nga paglulinghayaw.