Ang Tawag

ni Padre Jose “joesum” Sumampong, Jr.

Marso 7, 2021

Ika-3 nga Domingo sa Kwaresma (B)

EBANGHELYO (Juan 2:13-25)

13 Niadtong higayona hapit na ang Pangilin sa Pagsaylo, busa miadto si Jesus sa Jerusalem. ¹⁴ Didto sa Templo nakita niya ang mga tawo nga namaligyag mga baka, mga karnero, ug mga salampati. Nakita usab niya ang mga mangingilis og kuwarta. ¹⁵Unya si Jesus nag-himog latigo nga linubid ug giabog niya ang tanang mananap — ang mga karnero ug mga baka — ngadto sa gawas sa templo. Gilimbuwad usab niya ang mga lamesa sa mga mangingilis ug kuwarta, ug gisalibay ang ilang mga sinsilyo. ¹⁶Ug iyang gimandoan ang mga tawo nga namaligyag mga salampati, “Dad-a kini sa gawas! Ayaw ninyo himoang merkado ang balay sa akong Amahan.” ¹⁷Unya nahinumdom ang iyang mga tinun-an nga ang Kasulatan nag-ingon, “Ang akong pagmahal sa imong balay, O Dios, nagdilaab sulod kanako sama sa kalayo.” ¹⁸Unya nangutana kaniya ang kadagkoan sa mga Judio, “Unsay ilhanan nga ikapakita mo aron pagmatuod nga may katungod ka pagbuhat niini?” ¹⁹Si Jesus mitubag, “Gub-a ninyo kining maong Templo ug tukoron ko kini pag-usab sulod sa tulo ka adlaw.” ²⁰Sila miingon kaniya, “Kap-atan ug unom ka tuig ang pagbuhat niining Temploha, unya tukoron mo kini pag-usab sulod lamang sa tulo ka adlaw?” ²¹Apan ang templo nga gihisgotan ni Jesus mao ang iyang lawas. ²²Busa sa dihang nabanhaw na siya, nahinumdom ang iyang mga tinun-an nga gisulti niya kini; ug mituo sila sa Kasulatan ug sa gisulti ni Jesus. ²³Samtang si Jesus didto sa Jerusalem panahon sa Pangilin sa Pagsaylo, daghan ang nanuo kaniya sa pagkakita nila sa mga milagro nga iyang gihimo. ²⁴Apan si Jesus wala mosalig kanila, sanglit nasayod man siya sa tanang tawo. ²⁵Walay kinahanglan nga sultihan siya ni bisan kinsa mahitungod sa mga tawo, kay nasayod na man siya kon unsa ang anaa sa ilang kasingkasing. Ang Ebanghelyo sa Ginoo.

oOo

KAHULOGAN SA EBANGHELY0 (Juan 2:13-25)

13 Niadtong higayona hapit na ang Pangilin sa Pagsaylo, busa miadto si Jesus sa Jerusalem. 

   Si Jesus sa kanunay nagtagad sa pagsunod sa relihiyon sa mga Judio. Walo ka higayon nga si San Juan mitaho sa Ebanghelyo nga si Jesus misalmot sa mga kasaulogan sa pilgrimahe didto sa Templo (Jn 2:13, 5:1, 6:4, 7:2, 10:22, 11:55, 12: 1, 13:1), labi na niadtong gitawag og Pasch in Springtime ug ang Feast of Tents in Autumn. Maaninaw nato nga si Jesus mihimog mga pag-ampo ug miawit uban sa panon sa mga tawo samtang naglakaw sila sa dalan ug sulod mismo sa templo. Kining kasaulogan sa Pasko sa mga Judio mahimo unya nga Pasko sa mga Kristiyanos, nga nagasaulog sa balaang misteryo sa kasaysayan sa pakighilambigit sa Dios tali sa Tawo.

¹⁴ Didto sa Templo nakita niya ang mga tawo nga namaligyag mga baka, mga karnero, ug mga salampati. Nakita usab niya ang mga mangingilis og kuwarta. ¹⁵Unya si Jesus naghimog latigo nga linubid ug giabog niya ang tanang mananap — ang mga karnero ug mga baka — ngadto sa gawas sa templo. Gilimbuwad usab niya ang mga lamesa sa mga ma-ngingilis og kuwarta, ug gisalibay ang ilang mga sinsilyo. ^16aUg iyang gimandoan ang mga tawo nga namaligyag mga salampati, “Dad-a kini sa gawas…

   Daghang mga dibuho ang nagalarawan niining maong panghitabo: si Jesus masuk-anon nga nagkubot og latigo ug miabog sa mga mananap. Apan kon atong tutokan pag-ayo wala gayod siya manglatigo sa mga tawo.

   Makita usab nato nga, bisan siya nasuko, apan ang mga nagbaligya og mga salampati iyang gipakitaan og malumo nga pagtagad kon itandi sa uban. Wala niya aboga ang mga salamapati; iyang gipadala kini sa mga mamaligyaay ngadto sa gawas. Ang salampati maoy mga “halad sa mga kabos”. Gipakita ni Jesus ang iyang espes-yal nga pagtagad sa mga kabos.

^16b … Ayaw ninyo himoang merkado ang balay sa akong Amahan.” 

   Ang mga negosyante dili mga dautang tawo. Nakatabang pa hinoon sila sa mga tawo nga moduaw sa Templo sa ilang paghalad pinaagi sa ilang serbisyo.

   Ang iyang gipakita diha sa iyang kasuko mao ang dapit sa salapi nga gihatagan og dakong pagtagad 

¹⁷Unya nahinumdom ang iyang mga tinun-an nga ang Kasulatan nag-ingon, “Ang akong pagmahal sa imong balay, O Dios, nagdilaab sulod kanako sama sa kalayo.” 

   Ang Gugma sa Amahan nakapadilaab ni Jesus sama nga ang kalayo mopadilaab sa mga sagbot. Ang sakripisyo nga ihalad ni Jesus dili lamang rituwal, kondili sakripisyo nga anaa nagagikan sulod sa kasingkasing. Ang ihalad ni Jesus nga sakripisyo ngadto sa iyang Amahan mao ang mismo ang iyang Kaugalingon.

   Kinasingkasing ba ang akong pagsimba? Nagdilaab ba ako sa Gugma sa Dios?

¹⁹ … “Gub-a ninyo kining maong Templo ug tukoron ko kini pag-usab sulod sa tulo ka adlaw.” ²⁰Sila miingon kaniya, “Kap-atan ug unom ka tuig ang pagbuhat niining Temploha, unya tukoron mo kini pag-usab sulod lamang sa tulo ka adlaw?” 

   Nga gub-on niya ang Templo — nga gitukod ni Herod nga maoy gipasigarbo sa mga Judio nga maoy dapit sa pag-ampo  — maoy usa sa mga ginungdan ngano nga si Jesus gikasilagan sa mga Judio. Apan kon susihon pag-ayo ang pulong nga Griego sa Templo isip edipisyo (building) mao ang “ieron” nga maoy gigamit ni San Juan (Jn 2:14) sa paglarawan sa dapit diin giabog ni Jesus ang mga negosyante. Apan ang gigamit nga pulong nga Griego niining bahina sa saysay mao ang “naos” nga nagkahulogan og sanktuwaryo (Jn 2:19) nga mao ang labing balaan nga bahin  sa Templo.

²¹Apan ang templo nga gihisgotan ni Jesus mao ang iyang lawas. 

  “Naos” mao ang pulong nga gigamit niini. Si Jesus miangkon sa iyang kaugalingon nga “Sanktuwaryo”. Nga siya mao ang “Puloy-anan sa Dios”. Ang iyang lawas mao ang Templo, ang “Naos” — ang dapit nga himoan sa binag-ong pag-ampo!

²²Busa sa dihang nabanhaw na siya, na-hinumdom ang iyang mga tinun-an nga gisulti niya kini… 

   Mao na kini ang Pasko ni Jesus ug ang Pasko sa mga Kristiyanos nga naghingpit sa Pasko sa mga Judio nga gilarawan sa sinugdanan niining maong saysay sa Ebanghelyo (Jn 2:13). 

   Si Jesus mao na ang bag-ong tinubdan sa kagawasan gikan sa  pagka-ulipon kanatong mga  katawhan sa sala. Si Jesus mao na ang nagluwas kanato.

   Si Jesus mao na Bag-ong Templo! Busa ang pag-ampo karon dili na diha sa usa ka dapit lamang (building), apan diha sa Presensya sa Dios o sa Lawas ni Cristo. Ang tibuok nga kasaulogan sa liturhiya sa Simbahan anaa magasukad sa Lawas ni Cristo.  Ang atong panagtapok diha sa pag-ampo dili diay kay nagtapok kita sulod sa usa ka dapit kondili nagtapok kita isip sakop sa Lawas ni Cristo. “Kamo ang Lawas ni Cristo” (1 Cor 12:27). Dinhi nagasukad ang dignidad sa atong panagtapok: “… kamo templo sa Dios, ug nagpuyo diha kaninyo ang Espiritu sa Dios… Kay balaan ang templo sa Dios ug kamo mao ang templo niya” (1 Cor 3: 16-17).

PADAYONON NATO ANG PAG-AMPO ALANG SA ATONG HINIUSANG PAGMAYA UG

PAGPASALAMAT ATOL SA IKA-500 KA KASAULOGAN SA ATONG PAGDAWAT SA

PAGKA-KRISTYANO SA ATONG NASUD, 

UG SA ATONG PAGPANGANDAM SA IKA-DUHANG SINODO SA TAGBILARAN, UG PAGBALHINAY SA ATONG KAPARIAN! Amen.