Sinulat sa Primer
Giklaro ni Provincial Legal Officer (PLO) Nilo Ahat nga gitamud ug gisunod ang Procurement Reform Law, ubang lagda ug proseso sa mga transaksyon sa probinsiya.
Ang mga transaction records wala itago kay dayag ug makita sa mga government transparency sites sa internet, matud sa taho gikan sa kapitolyo.
Apan matud sa PLO, aduna lang gayud manguha ug mogamit sa mga records aron malisyosong i-intriga sa social media ug ubang paagi sa klarong pamulitika.
Usa sa mga kasayorang niabot sa buhatan sa PLO ang mahitungod sa pangdaot sa pagpalit ug bugas sa probinsiya agig responde sa epekto sa Coronavirus disease (Covid).
Namatikdan ni Ahat ug sa iyang mga sakop sa PLO nga ang mga inpormasyon sa social media post wala nitukma sa tinuod nga procurement sa probinsiya.
Iyang gitumbok, pananglitan, ang pasangil nga nikumpra ang kagamhanan sa Bohol ug bugas nga adunay kantidad ug P117 milyones gikan sa usa ka supplier apan matud ni Ahat wa kini nahitabo.
Nagtoo siya nga kini posibleng sa laing probinsiya, apan kapitolyo ang giigo kay ang nagpakatap sa intriga naila nga propagandista sa kontrang kampo sa pulitika sa kasamtangangang administrasyon sa probinsya.
Sama sa mga local government unit (LGU) sa ubang probinsiya, ang mga transaksyon dinhi dayag ug makita sa procurement transparency website sa nasud kay kini maoy lagda sa kagamhanan.
MGA SUMBANAN GILATID USAB
SA PROCUREMENT POLICY BOARD
Ang tanang transaksyon adunay sumbanan basi usab sa mga porma nga gilatid sa nasudnong procurement policy board, matud sa abogado sa lalawigan.
Moagig bidding ang kagamhanan sa pagpalit ug bisan ang negotiated transaction dayag nga i-post sa procurement transparency website sa kagamhanan.
PROVINCIAL ATTORNEY
MIDISPATSAR SA LAING INTRIGA
Sa laing intriga gikan sa susamang kampong pulitikanhon, gibanatan ang probinsiya kay kuno nagpalit ug usa lamang ka ambulansiyang nibalor ug P21 milyones.
Bakak ang maong pahayag kay matud ni Ahat, ang bayad nga P21 milyon naglakip sa pito ka mga ambulansiya ug klase-klaseng accessories o kahimananan nga hilabihan ka mahinungdanon.
Laing estorya ang mahitungod sa usa ka sakyanan nga gitubilan ug linibong litros sa krudo aron matud pa magsuroy-suroy lang sa probinsiya.
Sa pakisusi, nasayran sa provincial attorney nga ang plate number sa gitumbok nga sakyanan nga gitubilan ug nilibong litros nga kruso nakataod sa fuel tanker sa Provincial Engineering Office (PEO).
Gipasabot ni Ahat nga natural nga daghang krudo ang karga sa tanker kay mag-deliver ug gasolina alang sa mga ekipo sa PEO nga nagtrabaho sa mga proyekto sa nagkalain-laing dapit.
KLARO ANG LAGDA APAN LAHI ANG
ESTORYA
Sumala sa PLO, adunay transparency provision sa Akta Republika 9184 o Procurement Reform Act nga nagpadayag sa mga record aron mabasehan sa katawhan kon dunay angayng korehe-an.
Apan lahi na ang estorya kon intensyonal nga pahimuslan ang maong kagawasan aron among-amongan ang kagamhanan, buhatan o mga opisyal ug kawani niini, matud ni Ahat.
Pintok nga namahayag ang PLO nga matapos ang matag katungod o right kon magsugod na ang pag-abusar sa maong katungod aron among-amongan ang uban.
Nipahimangno si Ahat nga dunay mga balaod nga magsilot sa pag-abusar sa katungod aron gub-on ang reputasyon o integridad sa uban.