Sinulat ni Elvira Bongosia
Mihatag ug direktiba si Presidente Rodrigo Roa Duterte sa Department of Education (DepEd) nga dili una ipadayon ang giplanong magpahigayon ug face- to-face classes gawas na lamang kun magsugod na ang bakuna.
Kahinumdoman nga una nang gisugyot sa DepEd kang Presidente Duterte ang pagpahigayon ug pilot testing sa limited face-to-face classes sa 1,904 ka eskwelahan gikan sa 126 ka school divisions sa nagkalain-laing lugar.
Sa gipahigayong virtual presser kauban si Cabinet Secretary Karlo Nograles, nipahayag kini nga nahisgotan sa cabinet meeting niadtong Lunes sa gabii, Marso 1, 2021, ang kalabot sa pag-hold una sa face-to-face classes.
Matud pa ni Nograles nga giila man sa departamento ug sa gobyerno ang mga hagit sa ‘learning modalities’ nga mas gipili nga tugotan ang mga estudyante nga ipadayon ang ilang edukasyon apan nagtuo usab ang Pangulo nga ang kahimsog ug kaluwasan sa mga kabataan ug ang mga nagdumala sa pag-atiman sa edukasyon ang pinakamahinungdanon. Sa laing bahin, giingong giila usab sa Pangulo ang paningkamot nga mapagaan ang kakuyaw sa pagpahigayon ug face-to-face classes ug ang maampingon nga paagi sa pagduso nga i-hold ang maong face-to-face classes sa pagkakaron.