Sinulat ni Elvira Bongosia
Hipno ug andam na ang vaccination committee sa kagamhanang probinsyal alang sa pagpamakuna dinhi sa Bohol.
Nunot niini ang kagamhanang probinsyal nagpaabot lang sa detalyadong pahimangno gikan sa nasudnong mga tinugyanan didto sa kaulohan.
Mao kini ang gipahibalo ni Dr. Cesar Tomas Lopez atol sa virtual presser sa kapitolyo niadtong adlaw nga Martes, Mar. 2, 2021.
Matud niya nga ang mga frontlinbers ang mauna nga mabakunahan base sa listahan sa mga priority nga unang tupokan sa bakuna batok sa Coronavirus disease (Covid).
Sayo niini gipahibalo ni Lopez nga gisumite na sa Bohol Inter Agency Task Force (BIATF) sa kaulohan ang listahan -ang mga unang mabakunahan batok sa Covid dinhi sa Bohol human duna nay bakuna batok sa maong sakit ang miabot dinhi sa nasod gikan sa China.
Kahinumduman nga miabot na sa nasud ang bakuna nga ginama sa Sinovac niadtong miaging adlaw nga Dominggo, Feb. 28, 2021.
Dugang ni Lopez nga nagpaabot na lang sila sa pagdeliver sa mga stock sa bakuna batok sa Covid dinhi sa Bohol.
Ang vaccination committee miandam sa ilang mga tahas aron madali ug hapsay ang pagpamakuna dinhi sa Bohol.