Sinulat sa Primer
Gitaho sa kagamhanang probinsyal sa Bohol nga ang modernisasyon sa Garcia Memorial Provincial Hospital nagsugod na.
Ang maong kalambuan mitumaw human nibisita si Gov. Arthur Yap didto sa Garcia Memorial Provincial Hospital sa Talibon niadtong adlaw Miyerkoles, Marso 3, 2021, atol sa iyang pagtunol sa tinuig nga ayuda gikan sa kagamhanang probinsyal sa mga kabarangayan sa maong lungsod.
Dakong garbo nga gipakita ni Dr. Miguelito S. Jayoma ang chief of hospital ang bag-o nga dialysis center sa maong ospital. Ang maong dialysis center andam nga magsugod ug operate.
Gipakita usab ni Jayoma ang kasamtangang gitukod karon nga polymerase chain reaction (PCR) laboratory sa maong ospital.
Gawas niini, niabot nasab ang mga intensive care unit (ICU) equipment, chemotherapy, dialysis, x-ray ug ang bag-ong ambulansya.
Kini tanan lakip sa P 400 million nga modernization program sa mga ospital nga ubos sa kagamhanang probinsyal.
Gilaraw ang pagmoderno sa 10 ka mga tambalanan sa kagamhanang probinsiyal aron makahatag ug labing maayong healthcare system dinhi sa probinsya.
Ang dialysis center sa naasoy nga ospital adunay 10-bed capacity ug mahimong mo-alagad hangtod sa 24 ka taw matag adlaw. Nakahukom ang kagamhanang probinsyal nga magbutang ug dialysis center sa Talibon aron maka-alagad sa katawhan sa segundo distrito ug dili na kinahanglan mo-byahe ug layo ngadto sa syudad sa Tagbilaran.