Sinulat ni Dave Albarado
Ang Department of Labor and Employment (DOLE) miingon nga ang “no vaccination, no work” policy nga posible nga ipatuman sa bisan unsang kompaniya o patigayon, usa kini nga illegal nga lakang.
Gipahayag ni Labor Secretary Silvestre Bello III atol sa usa ka virtual press briefing niadtong Huwebes, Marso 4, 2021, nga walay legal nga basehanan ang naasoy nga polisiya ug dili mahimo nga ipatuman sa mga tag-iya sa mga patigayon.
Subay niini, si Bello mipasidaan sa mga kompaniya sa tibuok nasod batok sa pagpatuman sa maong polisiya ug miingon nga sila mahimong maga-atubang ug kaso ang mga tagdumala sa mga patigayon o employer nga magpatuman sa maong polisiya nga pugson ang mamumuo nga magpatupok ug bakuna batok sa Coronavirus disease (Covid).
Matud ni Bello nga dili magamit nga basehan sa usa ka employer ang pagdumili sa empleyado nga magpabakuna sa termination gikan sa trabaho.