Ang Tawag 

ni Padre Jose “joesum” Sumampong, Jr.

Marso 14, 2021

EBANGHELYO (Juan 3:14-21)

Ingon nga giisa ni Moises didto sa kamingawan ang bitin nga tumbaga nga gibutang og tukon, ang Anak sa Tawo kinahanglan nga iisa usab, ¹⁵aron ang tanan nga motuo kaniya makabaton og kinabuhing walay kataposan. ¹⁶Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak, aron ang tanan nga motuo kaniya dili mamatay, kondili makabaton hinuon sa kinabuhing dayon. ¹⁷Kay wala ipadala sa Dios ang iyang Anak nganhi sa kalibutan aron pagsilot kondili aron pagluwas niini. ¹⁸Ang tanan nga motuo sa Anak dili silotan, apan kadtong dili motuo kaniya gisilotan na, kay wala man siya motuo sa bugtong Anak sa Dios. ¹⁹Ug kini mao ang silot: ang kahayag mianhi sa kalibotan, apan gipalabi sa mga tawo ang kangitngit kay sa kahayag, kay daotan man ang ilang binuhatan. ²⁰Ug ang tanan nga nagbuhat ug daotan dili gusto sa kahayag ug dili moduol niini, kay dili siya buot nga mabutyag ang iyang daotang binuhatan. ²¹Apan ang magbuhat suma­la sa kamatuoran moduol sa kahayag aron makita nga nagmatinumanon siya sa Dios.  ANG EBANGHELYO SA GINOO.

oOo

KAHULOGAN SA EBANGHELY0 (Juan 3:14-21)

^14aIngon nga giisa ni Moises didto sa kamingawan ang bitin nga tumbaga nga gibutang og tukon…

   Ang Ebanghelyo karon nagdapit kanato sa “pag-isa sa atong mga panglantaw”. Gipahinumduman kita ni San Juan sa panghitabo sa Daang Kasulatan. Sulod sa kap-atan ka tuig didto sa kamingawan, ang mga Hebreo gisulong sa mga mangtas ug makapatay nga bitin (Numero 21:6-9). Si Moises naghimog “caduceus”, usa ka bitin nga tumbaga nga may gahum sa pag-ayo nga gitungtong sa usa ka tukon. Kining maong larawan sa bitin maoy gisagop nga timaan sa propes-yon sa pagka-doktor (doctor of medicine) hangtod sa atong panahon.

   Ang pag-isa sa maong bitin nga tumbaga wala magdala og magic. Wala magpasabot nga kinsa kadtong motan-aw niini, tungod sa pagtan-aw, maayo; kondili tungod kay ang pagtan-aw niini maoy usa ka timaan sa pagtuo (sign of faith), usa ka lihok nga ang tawo mipakitag pagsalig sa gahum sa Ginoo.

 ^14bang Anak sa Tawo kinahanglan nga iisa usab, ¹⁵aron ang tanan nga motuo kaniya makabaton og kinabuhing walay kataposan.

   Si San Juan midapit kanato sa pagha-ngad sa Krus. Anaa diha si Jesus nga nagdupa ug gilansang atubangan sa atong mga mata. Ang gigamit nga pulong sa Griego mao ang “uposthenai”  nga nagbasabot nga si Jesus: una, gituboy sa Krus, ug ikaduha, misaka ngadto sa tuong kamot sa Amahan sa panahon sa Pagkabanhaw ug Pagsaka sa Langit (Jn 3:14, 8:28, 12:32-34).

   Alang kang San Juan nga usa ka saksi sa aktuwal nga panghitabo sa paglansang kang Jesus ug pagtuboy niini sa balabag sa Krus, kining maong talan-awon mao ang nagpadayag nga ang Krus nga namatyan ni Kristo mao ang Himaya sa Dios!

   Ang krus nahimong timaan karon sa kaluwasan.  Mohangad kita niini diha sa pag-ampo kay dinhi makita nato ang labing lubos nga Gugma.

   Bisan pa sa kasakit nga giaguman ni Jesus sa balabag sa Krus, ang mga paglarawan niini nagpakita sa kamalinawon tungod kay dinhi si Jesus miampo man ngadto sa iyang langitnong Amahan.  Ang pagdupa mao usab ang porma nga gisagop sa mga pari panahon sa pag-ampo sulod sa Santos nga Misa. Ug kita misagop niini samtang mag-awit o mag-ampo sa “Amahan Namo”.

^16aKay gihigugma pag-ayo sa Dios ang kalibutan ug tungod niini gihatag niya ang iyang bugtong Anak…

   Sa atong panahon karon, dili malalis nga adunay mga panghunahuna nga nagpintal “sa kalibutan nga dautan ug wala nay paglaum”. Taliwala sa mga dautang panghitabo labi na sa gubat nga karon nagpadayon sa nasud sa Iraq, makai-ngon gayod kita nga kini tinuod.

   Ang Ginoo nakakita gayod sa dautang kahimtang sa kalibutan. Apan bisan pa niini, ang Ginoo nahigugma pag-ayo sa kalibutan.  Dili siya magpadaog sa dautan bisan pa sa panahon nga kini iyang ikahibalag.  Buot Niya nga luwason kini! Buot ang Dios nga mohingpit niini!

^16a …gihatag niya ang iyang bugtong Anak…

   Ang Gugma sa Dios maoy nakapaaghat kaniya sa paghatag sa iyang bugtong Anak kanato. Kabubut-on sa Dios: 1) nga ang tawo dili mamatay hangtud sa hangtud (Kaalam 1:13); 2) nga ang tawo mabuhi hangtud sa hangtud (Jn 3:3); 3) nga ang kalibutan sa iyang kinatibuk-an dili makondinar; 4) nga ang kalibutan maluwas; ug 5) nga ang mga buhat sa tawo mao ang “buhat sa Ginoo” (1 Timoteo 2:4).

^16baron ang tanan nga motuo kaniya dili mamatay, kondili makabaton hinuon sa kinabuhing dayon.

   Ang Ginoo mao ang KINABUHI! Ug ang kinabuhi mao ang labang mahi-nungdanong gasa nga mahuptan sa tawo. Ug ang Dios nagpaambit sa Iyang Kinabuhi nganhi kanatong mga tawo.  Apan kinahanglan nga kining maong gasa sa kinabuhing dayon atong pagadawaton.  Ang Ginoo nag-hatag kanatog kagawasan: kinsa kad-tong magdumili sa pagdawat niini anaa sa kamatayon.

¹⁷Kay wala ipadala sa Dios ang iyang Anak nganhi sa kalibotan aron pagsilot kondili aron pagluwas niini. ¹⁸Ang tanan nga motuo sa Anak dili silotan, apan kadtong dili motuo kaniya gisilotan na, kay wala man siya motuo sa bugtong Anak sa Dios…

   Ang Dios dili mokondinar kang bisan kinsa.  Ang tawo mismo mao ang nagkondinar sa iyang kaugalingon diha sa iyang pagsalikway sa Dios. Ang kinabuhi nga gitanyag sa Dios kanato mao ang Kinabuhing hingpit. Walay kulang! Mohangtud sa kahangturan!

   Gawasnon nga sagupon nato kini!

PADAYONON NATO ANG PAG-AMPO ALANG SA ATONG HINIUFANG PAGMAYA UG PAGPASALAMAT ATOL SA IKA-500 KA KASAULOGAN SA ATONG PAGDAWAT SA PAGKA-KRISTYANO SA ATONG NASUD, UG SA ATONG PAGPANGANDAM SA IKA-DUHANG SINODO SA TAGBILARAN, UG PAGBALHINAY SA ATONG KAPARIAN! Amen.