Sinulat ni Dave Albarado
Mukabat sa 16 ka positibong kaso sa Coronavirus disease (Covid) sa Bohol nakitaan ug mutation o kausaban sa virus pinasikad sa mga pagtuon nga gihimo sa Philippine Genome Center (PGC).
Kini ang gibutyag ni Dr. Cesar Tomas Lopez, tigpamaba sa Bohol Inter Agency Task Force (BIATF), atol sa presser sa kapitolyo niadtong adlaw Huwebes, Mar. 11, 2021, nga niadtong unang semana sa bulan aa Pebrero dunay 80 ka mga samples ang gipadala sa kaulohan aron ipaubos sa genome sequence.
Matud pa nga 16 sa mga samples ang nakitaan sa gitawag nga mutation of potential clinical significance nga gitawag sab ug B1.1.28.
Dugang ni Lopez nga sa 16 ka samples nga nakitaan sa mutation of potential clinical significance, 14 ka mga samples gikan sa lungsod sa Dauis, usa ka sample ang gikan sa lungsod sa Maribojoc ug usa ka sample ang gikan sa lungsod sa Bilar.
Hinuon matod ni sa tigpamaba nga ang tanan nga mga paseyente nga nakitaan ug mutation sa virus naulian na.
Sumala ni Lopez ang pinakabata sa pasyente nga adunay kitaan ug virus mutation nag-edad ug 22 samtang ang pinakataas ug edad 49 anyos.
Miingon si Lopez nga sa maong mutation nakita ang kausaban sa genome sequence kasagaran didto sa spike protein sa virus.
Gihulagway ni Lopez nga ang mutation dunay high transmissibility kun mas paspas nga makatakod nga gituhoang maoy hinungdan sa pagsaka sa mga kaso sa virus dinhi sa Bohol sa mga milabay mga semana.