Sinulat ni Rey Anthony Chiu
Gimugna pinaagi sa usa ka Executive Order pinitsahan Marso 5, 2021 ang Bohol Provincial COVID-19 Vaccination Operation Center (Bohol PVOC) nga gilangkoban sa unom ka mga bahan.
Ang nahisgutan nga executive order napagawas sa susamang adlaw nga ang unang hugna sa bakuna nga gidonar sa China, nahidangat sa Bohol.
Pinaagi sa Executive Order No 18, gipahimutang ni Gobernador Arthur Yap ang sentro nga maoy magtutok sa pagplano ug pagpatuman sa programa sa pagpangbakuna batok sa Coronavirus disease (COVID) dinhi sa Bohol.
Tumong usab niini ang paghugpong sa mga ahensya ug mga katambayayong nga mga sector aron makatanyag sa alayon aron matubag ang mga suliran nga masagubang niini.
Gawas pa, kining Bohol PVOC maoy magcoordinate sa pagpatuman sa pagpangbakuna sa mga kalungsuran, magduso sa regular nga mga readiness assessment, ug magpasa sa mga suliran nga dili masulbad sa lokal nga lebel ngadto sa Regional VOC.
Regular ang PVOC nga magsumitir sa inadlaw nga mga bulletins nga nagpadayag sa nabakunahan, mga mingbalibad una, ug sa mga nagdumili, mga dili kasarangan nga epekto human mabakunahi, ug mga dili kasarangan nga epekto sa bakuna sa mga tawo nga natumbok nga special interest.
Nalangkob sa Bohol PVOC ang Management Team nga giapilan nila ni Provincial Administrator Kathyrin Pioquinto, Dr Mutya Kismet Macuno, Dr. Cesar Tomas Lopez, Dr. Kazan Baluyot ug Dr Jefferson Ong.
Lakip na usab niini ang Planning, Campaign Management ug Technical Team nga gipangulohan ni Dr. Portia Reyes, ang Cold Chain ug Logistics Team nga gipangulohan ni Dr. Rey Perpetuo Belderol.
Anaa usab didto ang Vaccine Implementation Team nga gipangulohan ni Dr Anthony Damalerio, ang Vaccine Safety, Surveillance and Response Team nga si Dr, Greg Julius Sodusta ang teamleader ug ang Communications and Advocacy and Partnership Team nga ang team leader mao ang bag-ong hepe sa Provincial Government Media Affairs nga si Reinerio Makinano.