Sinulat ni Elvira Bongosia
Gidepensaan sa Department of the Interior and Local Government (DILG) ang desisyon sa Inter-Agency Task Force (IATF) na pagtangtang sa Philippine National Police (PNP) travel authority ug medical certificate nga requirement sa mga pagbyahe sa nasud.
Sa usa ka pahayag, gipasabot ni DILG Undersecretary Jonathan Malaya nga ang resolusyon sa IATF nga nagpatuman sa streamlined protocols alang sa mga local government units (LGUs), gihimo sa DILG nga may koordinasyon sa PNP ug mga local chief executives sa tibuok nasud.
Giklaro usab ni Malaya nga ang polymerase chain reaction (PCR) test wala bisan kanus-a nahimong requirement sa nasudnong kagamhanan. Gihimo lang kini sa ubang LGUs.
Sa bag-ong protocol, mahimo pa gihapong i-require ang PCR test sa LGU sa padungan nga lugar apan dili na kinahanglan ang rapid antigen tests isip requirement sa pagbyahe.
Matud pa nga dili na usab kinahanglan nga ipaubos pa sa quarantine facilities ang mga travelers gawas na lamang kun magpakita kini ug mga sintomas pag-abot sa padungan nga lugar.
Niadtong Lunes, Marso 1, 2021, gi-kumpirmar sa DILG nga ang travel authority gikan sa PNP ug ang medical certificate gikan sa LGU health office dili na required sa pagbyahe human gi-aprobahan sa IATF-MEID ang hiniusang national travel protocol sa land, air, ug sea nga gi-rekomendar sa departmento.
Nakadawat kini ug pagsaway gikan kang Bise Presidente Leni Robredo tungod kay matud pa posibleng hinungdan lang kuno kini sa pagsaka sa mga kaso sa Coronavirus disease.