Sinulat ni Dave Albarado
Ang presidente sa usa ka people’s organization didto sa Trinidad, Bohol gipusil patay sa mga wala pa mailhing mga tawo, sumala pa sa usa ka taho gikan sa Kampo Dagohoy.
Gi-ila ang biktima nga si Librado Ybanez Jr. alias Jesus, 39, minyo, president sa Kauswagan United Farmers for Forest Agrarian Reform Development (KUFFARD) ug taga Purok 5, Kauswagan, Trinidad.
Base sa imbestigasyon sa Trinidad Police Station nagbutyag nga ang insidente nahitabo mga alas 5:30 sa hapon, Mar. 15, 2021, didto sa Purok 5, barangay Kauswagan, Trinidad, Bohol.
Nasayran sa maong imbestigasyon nga ang biktima nagbiyahe gikan sa lungsod sa Talibon paingon sa ilang panimalay sakay sa motorsiklo ug kauban niya ang usa ka Luth Ipili nga maoy backrider.
Paghidangat sa maong dapit, usa ka lalake ang nibabag sa ilang gi-agian ug nipusil sa biktima gamit ang wala pa matinong kalibre sa armas samtang ang kauban niini nga si Ipili ang gimandoan sa lalake nga mipusil sa biktima nga mosibat palayo sa maong dapit.
Human sa pagpamusil, ang suspetsado nisibat pod gikan sa maong dapit ug ang insidente gihimoan ug follow-up investigation sa mga sakop sa Trinidad Police Station alang sa pagtino sa motibo sa pagpamusil patay.