Gisulat ni Dave Charles Responte
Vice Gov. Rene Relampagos
Ang kahimtang sa insurehensiya dinhe sa Bohol gituki sa usa ka executive session sa Sangguniang Panlalawigan (SP) niadtong milabay nga adlaw nga Martes, Mar. 16, 2021.
Mao kini ang gibutyag ni Vice Gov. Rene Relampagos atol sa pakighinabi sa mga sakop sa media, human sa regular session sa Hunta Probinsyal.
Matod ni Relampagos nga gihimo ang executive session human narefer sa Committee of the Whole niadtong Enero 12, 2021 ang usa ka privilege speech ni Board Member Elpidio Jala nga nangutana bahin sa estado sa insurhensya dinhi sa lalawigan.
Nahibaw-an sa maong executive session nga kasagaran sa mga barangay ug mga local government units (LGU) sa Bohol ang mideklara nga persona non grata ang bahan sa Communist Party of the Philippines (CPP), New People’s Army (NPA) ug National Democratic Front (NDF).
Niatubang sa naasoy nga executive session sila si Bohol Provincial Police Director Col. Joselito Clarito, ug mga tinugyanan sa 47th Infantry Batallion sa Philippine Army (PA), National Bureau of Investigation (NBI), Criminal Investigation and Detection Group (CIDG), Department of Interior and Local Government (DILG) ug ang Provincial Task Force to End Local Communist Armed Conflict (PTF-ELCAC).