Sinulat ni Dave Albarado
Atty. Nilo Ahat
Wala matandog ang Bids and Awards Committee (BAC) sa kapitolyo taliwala sa mga pasangil nga gi-isa batok kanila ni kanhi mayor sa Tagbilaran nga si Dan Neri Lim.
Migawas ang maong taho human napatik sa usa ka pamantalaan didto sa kauluhan nga misang-at ug usa ka request for assistance si Lim kabahin sa mga gi-alegar nga anomaliya sa pipila ka mga transaksyones sa kagamhanang probinsyal apil niini ang pagpamalit ug mga motorsiklo nga giingong adunay irregularidad.
Hinoon, wala makurat ang mga sakop sa BAC nga pinanguluhan ni Provincial Legal Officer (PLO) Nilo Ahat.
Mipagawas ug pamahayag ang BAC nga pinanguluhan ni Ahat human migawas ang mga taho nga adunay request for assistance nga gisang-at si Lim ngadto sa Ombudsman didto sa kauluhan.
“We, the Bids and Awards Committee of the Province of Bohol, unanimously declare our unweavering adherence to government principles of Republic Act 9184 — competitiveness, public monitoring, transparency, streamlined process and accountability,” matud sa ilang pamahayag
[Kami, ang Bids and Awards Committee sa probinsya sa Bohol, mideklarar sa way paglubad nga pagsunod sa mga prinsipyo sa Republic Act 9184–pakigcompetensya, public monitoring, walay tago-tago, hapsay nga proseso, ug accountability.]
Dugang pa sa ilang pamahayag, mibarog sila sa ilang legal nga tahas isip clearing house sa mga lakang sa pagpamalit nga gihimo sa kagamhanang probinsyal ug tanan giseguro nga pinasubay sa lagda sa balaod.
“We stand by our legal duty as a clearing house of Bohol provincial procurement activities and ensure that the provincial government abides by the standard set by law,” matud sa pamahayag [Mibarog kami sa among legal nga tahas isip clearing house sa mga kalihokan kabahin sa pagpamalit sa sulod sa kagamhanang probinsyal, pinasubay sa mga lagda sa balaod.]
Sumpay pa sa ilang pahayag, “Tungod niini, walay igong hulga nga makapakgang kanamo sa pagtuman sa among buluhaton. “
Dugang pa nila sa ilang pamahayag, “Sukwahi sa balita, walay pagpanglaktod nga gihimo ang provincial government sa pagpamalit ug paggasto sa pondo. “
Hangyo sa katawhan sa mga taga BAC agi ug dugang sa ilang pamahayag, “Gani, bisan taliwala sa pandemya diin ang katawhan nanawagan alang sa paspas ug dinali-ang pagtunol sa serbisyo ug ayuda, amo gihapon nga gisunod ang haum ug tukma nga proseso. “
Dugang pa nila, “We followed what the national government prescribes as the procurement procedure understates public health emergency.” [Gitamod namo ang mga lagda sa nasudnong kagamhanan taliwala sa usa ka public health emergency.]
Isip panapos sa ilang pahayag, “Busa, saligi nga kami mopadayon ug kini among pagatumanon.”