Sinulat ni Dave Albarado
Wala na kaagwanta si Gob. Arthur Yap ug misang-at na ug sumbong batok sa usa ka magpapatigayon nga nagbase sa kauluhan nga kanunay nga muhatag ug pagsaway ngadto sa gobernador pinaagi sa social media.
Gipasaka ang kaso nga cyberlibel batok ni Wilie Ramasola, atubangan sa Provincial Prosecutor’s Office niadtong adlaw nga Huwebes, Mar. 17, 2021.
Nunot niini, mipagawas ug pamahayag ang gobernador human gisang-at ang kasong cyber libel batok kang Ramasola.
“Isip amahan sa lalawigan sakit sa akong balatian nga mosang-at ug kaso batok sa usa ka tawo nga sukad pa kaniadto walay laing buhat kung dili magsigeg batikos ug pakaulaw kanako pinaagi sa adlaw-adlaw nga postings sa Facebook nga tumo-tumo ug mga bakak,” matud pa sa gobernador.
Dason pa ni Yap, “Sobra na ang pagpanamastamas sa akong ngalan, sa usa ka tawo nga nag-pangan na si Willy Ramasola. Dili nako ni siya kaila apan iyang gitunob-tunoban ang akong tawhanong katungod. Giagwanta ko kini sa dugay’ng panahon ug gitas-an ang akong pasensya ug padayon kong nagtrabaho sa akong katungdanan. “
Matud pa sa gobernador nga niabot ang panahon nga ang gipasakaan ug kaso, wala nay respeto sa gobernador ug giingong giamong-among ang laing kawani sa kagamhanang probinsyal.
“Apan miabot sa punto nga wala nay respeto ang maong tawo ug giamong-among pa ang laing mga kawani sa kagamhanang probinsiyal nga nagtininood sa ilang trabaho.Nalooy ko nila ug sa ilang mga pamilya kay dili man sila mga politiko,” sumala sa gobernador.
Hinoon, matud ss gobernador nga gidawat niya ang mga kritisismo, apan dili makatarunganon ang butang-butangan ug storya.
“Sanglit gidawat ko ang mga kritisismo ug mga pagsaway, dili makatarunganon nga butang-butangan kita ug mga storya ug mga bakak, aron lamang pag-daot kanato aron molampos ang iyang tingoha. Walay hunong ang mga pangdaot ug pagsabwag sa mga bakak nga dili makatabang.” Dugang pa ni Yap, “Ang isig katawo ubos sa balaod, naay katungod sa free speech, apan wa tay katungod nga mangbastos sa uban. Wala kita makigharong ug minaog sa iyang lebel nga magbinastos usab, apan kinahanglan nga panalipdan nato ang atong pangan tungod kay usa ra kini. Hilom ra kitang nagtrabaho ug nag-atubang sa mga problemang dala sa pandemiya para makalingkawas ang katawhang Bol-anon ug di ko motogot nga naay maka guba o makadaot sa akong gi-panumpaan nga katungdanan isip gobernador sa atong pinalanggang lalawigan.”