Sinulat ni Elvira Bongosia
Nagpahinumdom si Anti-Red Tape Authority (ARTA) Director General Jeremiah Belgica sa mga opisyal sa gobyerno nga dili ibutang ang ilang pangalan o hulagway sa mga pampublikong dokumento samtang nagkaduol na ang eleksyon.
Kini human sa giingong daghang nadawat nga reklamo ang buhatan ni Belgica kalabot sa pipila ka opisyal sa gobyerno nga gibutang ang ilang pangalan o nawong sa mga pampublikong dokumento sama sa permits ug licenses.
Matud pa ni Belgica, dugay nang gipahimoslan sa mga politiko ang sistema aron lang magpabati nga modagan sila sa sunod nga eleksyon o ipakita niini sa katawhan nga may gihimo silang pabor alang kanila.
Gipahinumdoman ang mga opisyal sa gobyerno nga ang pagbutang ug pangalan o nawong sa usa ka politiko sa mga government documents dugay nang gidili ubos sa Anti-Epal provision o General Provision No. 82.
Ubos sa Anti-Epal provision, gidili ang self-promotion sa bisan kinsang opisyal sa gobyerno pinaagi sa pangalan, litrato, programa, proyekto o bisan unsa pa nga inisyatibo nga gipondohan sa General Appropriations Act.
Tungod kay nagkaduol naman sad ang eleksyon, nagpahinumdom si Belgica sa parehas niyang kawani sa gobyerno nga ihunong ang pagbutang sa hulagway ug pangalan nila sa mga government-funded projects tungod kay gi-sweldohan man sila sa katawhan ug dili kini utang kabubot-on sa mga opisyal.
Katungdanan sa ARTA nga i-monitor ang compliance sa mga ahensya sa Republic Act 11032 o ang Ease of Doing Business and Efficient Government Service Delivery Act of 2018, mao nga tigpahigayon ang ahensya ug mga surprise inspections sa mga ahensya sa gobyerno aron maseguro nga hapsay nilang ginahimo ang ilang serbisyo agi ug pagsunod sa balaod.
Gi-awhag usab ni Belgica ang publiko nga kuhaan ug litrato o video ang bisan unsang dili maayo nga serbisyo nga ilang madawat gikan sa mga ahensya sa gobyerno tungod kay paglapas kini sa balaod ug sa Citizen’s charter sa ahensya.