Sinulat ni Elvira Bongosia
Pres. Rodrigo Duterte
Kinahanglang mahatagan ug libreng face masks ang tanan aron makasunod sa minimum health protocols, matud pa ni Presidente Rodrigo Duterte.
Sa Talk to the People on COVID-19 niadtong Marso 15, 2021, miingon ang Presidente nga pila ka higayon gigamit ang mga daang mask ilabi na sa mga wala’y ikapalit.
“It’s the mask, ilang gamit lang ‘yan. Iba luma na, isang buwan na gamit because they don’t have money to buy,” matud pa ni Duterte.
Gibalik na usab sa Presidente ang una niining pahayag nga angay manghatag ug ibreng mask ang gobyerno.
“We have to provide masks for everyone. Kung yung tao walang pambili, how would you expect compliance,” pahayag pa ni Duterte.
Gitahasan sa Presidente ang Department of Interior and Local Government (DILG) ug mga kapitan sa barangay nga motabang sa pangapod-apod ug face mask sa ilang mga nasakupan.
Gawas sa pagsuot ug face mask, kinahanglan usab nga magsuot ug face shield ang mga mogawas sa ilang panimalay ug sundon ang gipatuman nga social distancing aron makalikay sa Coronavirus disease.