ni Padre Jose “Joesum” Sumampong, Jr.
Abril 4, 2021
Domingo sa pagkabanhaw sa Ginoo (B)
EBANGHELYO (Mk 20:1-9)
Sayo sa Domingo sa buntag, samtang ngitngit pa, si Maria Magdalena miadto sa lubnganan ug nakita niya nga ang bato naligid na gikan sa baba sa lubnganan. 2Midagan siya ug miadto kang Simon Pedro ug sa tinun-an nga gimahal ni Jesus, ug giingnan niya sila, “Gikuha nila sa lubnganan ang Ginoo ug wala kami mahibalo kon hain nila ibutang siya!”
3Unya si Pedro ug ang laing tinun-an nangadto sa lubnganan. 4Nagdagan silang duha, apan ang maong tinun-an mas kusog nga midagan kay kang Pedro ug nahiuna pag-abot sa lubnganan. 5Mitikubo siya ug iyang nakita ang panapton nga lino, apan wala siya mosulod. 6Miabot si Simon Pedro sunod kaniya, ug midiritso siya ngadto sa lubnganan. Ug nakita niya didto ang panapton nga lino, 7ug ang panapton nga giputos sa ulo ni Jesus. Wala kini mahitipon sa panapton nga lino kondili gilukot ug gilain pagbutang. 8Unya kadtong tinun- an nga nahiuna pag-abot sa lubnganan misulod usab ug nakakita siya ug mituo. (9Wala gihapon sila makasabut sa bahin sa Kasulatan nga nag-ingon nga mabanhaw siya.) Ang Ebanghelyo sa Ginoo.
oOo
KAHULOGAN SA EBANGHELY0 (Juan 20: 1-9)
1Sayo sa Domingo sa buntag, samtang ngitngit pa…
Ang upat ka mga ebanghelista nagkahiusa sa pagmatuod nga ang Pagkabanhaw nahitabo sa adlaw tapos sa Sabado nga gitawag og Pasko sa mga Judio. Si San Juan naglarawan niini nga “unang adlaw”, ang sinugdanan sa bag-ong kalibutan, bag-ong binuhat, bag-ong semana sa Genesis…
Ang mga kasakitan ug kamatayon mao ang gihimong rason sa uban ngano nga, matud pa nila, walay Dios. Sila morason: Kon anaa pay Dios ngano man nga aduna may daghang mga kasakitan ug ngano nga mahitabo man ang kamatayon?
Kon magdumili kita sa pagtuo sa Pagkabanhaw, kadtong mga miduso sa argumento nga walay Dios, dili usab nato matubag. Ang mga pagtulun-an sa mga Amahan sa Simbahan (Fathers of the Church), ug kini usab gidasunan sa daghang mga lawom nga namalandong sa Balaang Kasulatan, mipasabot nga dili unta kita himoon sa Dios (first creation) kon wala pa siyay natan-awan nga ikaduhang pagkabuhi sa tawo (second creation) diin didto “Pahiran niya ang ilang luha ug wala nay kamatayon ni kasubo, paghilak o kasakit, kay nahanaw na man ang daang mga butang” (Gipadayag 21:4).
1b … si Maria Magdalena miadto sa lubnganan…
Nagkasibo usab ang gisulat sa upat ka mga ebanghelista nga ang mga babaye maoy unang nakakaplag nga si Cristo nabanhaw. Si San Juan mipili nga iyang ipahisentro diha sa usa ka babaye nga mao si Maria Magdalena (basaha usab sa Juan 20;11-18).
1c … ug nakita niya nga ang bato naligid na gikan sa baba sa lubnganan. 2 Midagan siya ug miadto kang Simon Pedro ug sa tinun-an nga gimahal ni Jesus…
Midagan siya. Mahinungdanon kining maong detalye. Wala pa siya makakita ni Jesus. Wala pa siya mutuo sa pagkabanhaw. Nalisang siya sa iyang nakaplagan—nga wala ang lawas ni Jesus sulod sa lubnganan. Midagan siya aron sa pagtaho bahin niini.
Usa ra ang iyang hunahuna: nga gikawat ang lawas ni Jesus. Kining walay nay sulod nga lubnganan dili pa maoy kamatuoran nga si Jesus nabanhaw. Apan nahimo na kining usa ka hagit sa pagtuo. Sa pito ka higayon ato kining mabasa karon.
3 Unya si Pedro ug ang laing tinun-an na-ngadto sa lubnganan. 4 Nagdagan silang duha, apan ang maong tinun-an mas kusog nga midagan kay kang Pedro ug nahiuna pag-abot sa lubnganan.
Si Juan, ang magsusulat niining maong Ebanghelyo, nahinumdum pag-ayo sa maong panghitabo tungod kay saksi man siya.
5 Mitikubo siya ug iyang nakita ang panapton nga lino… 6Miabot si Simon Pedro sunod kaniya, ug midiritso siya ngadto sa lubnganan. Ug nakita niya didto ang pa-napton nga lino, 7ug ang panapton nga giputos sa ulo ni Jesus. Wala kini mahitipon sa panapton nga lino kondili gilukot ug gilain pagbutang.
Ang paglarawan ni San Juan sa maong hitabo, labi na sa saysay mahitungod sa sapot, nagapasabot gayod nga walay laing kamot sa tawo ang nahilambigit niining maong panghitabo. Ang lawas ni Jesus nawala, samtang ang sapot nagapabilin sa iyang nahimutangan. Pagkakatingalahan!
8 Unya kadtong tinun-an nga nahiuna pag-abot sa lubnganan misulod usab ug nakakita siya ug mituo. (Wala gihapon sila makasabot sa bahin sa Kasulatan nga nag-ingon nga mabanhaw siya.).
Si Pedro wala pa makasabot. Gani siya nalibog (Lukas 24:12).
Si Maria Magdalena may tawhanong hunahuna: Nga ang lawas ni Jesus gikuha. Si Pedro wala makasabot. Apan si Juan maoy nakatugkad niini: Nakita niya kini busa siya mituo. Si Pedro nakakita sa nakit-an ni Juan, apan si Pedro wala matugkad sa kahulogan niini.
Karon ato nang mahibaloan ngano nga si Juan mitawag sa iyang kaugalingon nga “ang tinun-an nga gihigugma ni Jesus”. Tungod sa maong gugma si Juan midagan nga mas kusog, siya mituo. Didto sa usa ka lanaw si Juan usab ang unang nasayod nga si Jesus diay kadto, una pa kang Pedro (Juan 21:7).
Ang Pagtuo diay nagasukad sa Gugma. Ang matag usa kanato gidapit sa paghigugma una aron usab mas malig-on ang Pagtuo.
Ang Pagtuo may kasamahan sa labing lawom nga kasinatian sa tawo: dili gayod nato makita ang gugma niadtong mga nahigugma kanato, ang atong makita mao lamang ang mga timaan sa ilang paghigugma. Apan kining maong mga timaan kinahanglan pa gayod nga atong masabtan. Mahimo lamang makahuloganon ki-ning maong mga timaan niadtong mga tawo nga sa tinuoray nahigugma. Ang lihok, ang pulong, ang gasa, kini sila mga timaan, nagkinahanglan pa kini sila nga atong hatagan sa saktong kahulogan. Ang paghigugmaay lamang maoy makahatag sa usag-usa sa matuod nga kahulogan.
9b (…sa bahin sa Kasulatan nga nag-ingon nga mabanhaw siya.)
Ang mga makita sa palibot dili pa gayod igo. Tungod kay si Juan mitugot nga siya maagak sa lamdag sa Espiritu Santo nga maoy mohatag og saktong kahulogan sa maong panghitabo, siya nakasabot. Sa iyang pagsaksi sa maong panghitabo siya nahinumdum sa mga gisulat bahin niini (Hosea 6:2, Salmo 2:7, 15:8, Jonas 2:1).
Mao usab kini sa atong kinabuhi. Makasabot lamang kita sa mga panghitabo sa atong kinabuhi sa lawom nga paagi kon inabagan sa kalamdag nga iya gikan sa Dios.
=====
PADAYONON NATO ANG PAG-AMPO ALANG SA ATONG HINIUSANG PAGMAYA UG
PAGPASALAMAT ATOL SA IKA-500 KA KASAULOGAN SA ATONG PAGDAWAT SA
PAGKA-KRISTYANO SA ATONG NASUD,
UG SA ATONG PAGPANGANDAM SA IKA-DUHANG SINODO SA TAGBILARAN, UG PAGBALHINAY SA ATONG KAPARIAN! NIINING PANAHON NGA SAULOGON NATO PANAHON SA PAGKABANHAW 2021.