Sinulat ni Elvira Bongosia
Gipamatud-an sa Department of the Interior and Local Government (DILG) nga gisaka na ang klasipikasyon sa priority list alang sa vaccination rollout sa gobyerno sa mga gobernador, mayor ug mga kapitan sa barangay.
Matud pa ni DILG Undersecretary Epimaco Densing III, gi-aprubahan na sa Inter-Agency Task Force on Emerging Infectious Diseases (IATF-EID) ang ilang rekomendasyon kalabot niini nga naga-ingon nga:
“All 1,715 governors and mayors, and 42,046 barangay captains, inaprubahan po natin na iangat po ang kanilang classification,” matud pa ni Densing.
Matud pa niini nga gikan sa kaniadtong B3 lamang, o other essential workers, naa na sa A4 karon ang mga nahisgotang mga lokal nga opisyal.
Ang A4 classification gilangkoban sa mga frontline personnel sa essential sectors, kauban ang mga uniformed personnel ug mga naa sa working sectors nga natumbok nga ‘essential’ o mahinungdanon sa panahon sa enhanced community quarantine (ECQ).
Pinasikad sa prioritization sa gobyerno, makadawat kining maong hingtundan nga mga opisyal ug bakuna batok sa Coronavirus disease (Covid) human sa mga frontline health workers nga gikonsiderar nga A1; indigent senior citizens nga naa sa A2; ug ang nahabilin pang senior citizens ug persons with comorbidities nga naa sa A3 classification.
Samtang naapil sa A5 ang nahabilin pang indigent population ug kauban sa B1 ang mga magtutudlo ug social workers.
Kahinumdoman nga ning bag-o lang, unom ka mayor ang gimanduan sa DILG nga magpasabot human ni una sa pagpatopok ug bakuna batok sa Covid.